Amaitutzat ematen da Jantoki kasuak eragindako zalapartaren ostean Eusko Jaurlaritzak Bizkaiko bost ikastetxeri zabaldutako aukera pilotuaren epealdia.

2016tik eskola-jangelen kudeaketa nork bere gain hartzeko aukera izan dute Orduña LHIk, Markina-Xemeingo eskola publikoak, Gernikako Allende Salazar eskolak eta Mungiako Laukariz eskolako publikoak. Eusko Jaurlaritzako Hezkuntza sailak aukeratutako proiektu pilotuak izan dira, eta balorazioak aurkezteko unea da.

Lau ikastetxe horiek ezaugarri amankomunak dituzte: sukaldea dute ikastetxean eta sukaldariak Hezkuntza Sailaren menpeko langileak dira (Urduñan izan ezik). Askotariko egoerak dauden han eta hemen, baina gurasoen artean mugimendua indarra hartzen ari da.

Lau ikastetxe horien esperientziatik asko ikasiko dute eskola-jangela eredua eraldatzeko nahia duten ikastetxeetan. Hala azaldu du Gure Platera Gure Aukera zein Bidezko Elikadura talde koordinatzaile den Eneko Viñuelak.

Hainbat informazio bilera egiten ari da interes hori erakutsi duten hezkuntza komunitateekin. Atzo, esaterako, Elgetan (Gipuzkoa) izan zen herriko zein inguruko udalerrietako gurasoak informatzeko.

Indarrean dagoen araudiaren gaineko xehetasuna zein proiektu bat lantzeko nondik hasi daitekeen izan zituen hizpide. Ahalegin horretan, laguntza handikoa izan daiteke Gure Platera Gure Aukera ekimenetik sarean jasotako informazioa.

—

ENEKO VIÑUELA: “Aldez aurretik lan egitea oso oso garrantzitsua da. Prest egon behar dugu unea datorrenerako”

Nondik hasi beharko litzateke eskola-jangelaren eraldaketa?

Nire ustez pausoak pixkanaka egin behar dira. Eskola komunitateak erabaki beharko du noraino eraldatu nahi duen eskolako jantokia eta garrantzitsua izango da familiekin, irakasleekin, ikastetxeko zuzendaritzarekin eta jangelako langileekin egotea proiektua eta helburuak finkatzeko. Erabaki hori hartutakoan hasi beharko dute mugitzen lehen sektoreko nekazariekin harremanetan jartzeko eta ikusteko zer nolako ekoizpena dagoen gertuan. Erabakiak eta helburua elkarlanean finkatzea komeni da.

Zer dio gaur egun indarrean dagoen araudiak?

Eusko Jaurlaritzak daukan normatibarekin, oraingoz, gutxi egin daiteke baina espero dugu hilabete gutxi barru egoera aldatzea eta baldintza berriak egoeta. Une honetan jarrera aldaketa sumatu dugu agintariengan.

Hain zuzen ere, eskola komunitateek aukera izan beharko luketa erabakitzeko zer nolako jangela eredua nahi duten. Gaur egun gauzak ez dira horrela, eta gure apustua da eskoletan sukaldeak egotea eta produktuak bertakoak izatea.

Eskaera gero eta zabalagoa da?

Bai, gero eta mugimendua handiagoa sumatzen dut. Lau proiektu pilotu egon dira eta funtzionatu dute. Horrek garrantzi handia dut. Motibatuta ikusten ditut hainbat ikastetxetan eta oso garrantzitsua da hori. Badirudi gurasoak hasi direla mobilizatzen.

Eskola-jantokia eraldatzeak zerbitzuaren prezioa garestitzen du?

Baditugu marra gorri batzuk. Zerbitzua ezin da erabiltzaileendako garestitu eta langileen gaia ere hor da. Orain arteko lan baldintzak errespetatu egin behar dira. Landu beharreko kontua da. Gure ustez esparru publikoa izanik Jaurlaritzak hartu beharko luke langileen ardura bere gain.

Zer gertatu da fase pilotuan ziren lau ikastetxeekin?

2016an hasi zen esperientzia pilotuen fasea eta aste honetan eman dute amaitutzat. Lau ikastetxe izan dira eta egin dute bide bat, eta bide horrekin ikasi dituzte gauza asko. Aurkeztu dituzte konklusioak eta positiboak izan dira. Aldarrikatzen duguna posible da.

Gaur egun indarrean dagoen legea 2000. urtekoa da. Dugun informazioaren arabera Jaurlaritza prest egongo litzateke arautegi hori aldatzeko eta horrek aukera emango lieke bestelakoa jangela ereduei. Bitartean zer egin behar dugu? Une hori iristen denerako ondo prestatu. Informatu, helburuak finkatu, dauden aukerak aztertu, eskola komunitateko eragile guztiekin gaia landu, proiektua idatzi… Aldez aurretik lan egitea oso oso garrantzitsua da. Prest egon behar dugu une datorrenerako.