Pandemiak ekarritako geldialdiak “hausnartzeko eta berramesteko” abagunea eman diela azaldu dute Oinherriko kideek, eta tartean, Eskola Kirolari ere bere lekua eman nahi diotela: “Oinherrin eskola kirolak balioen hezkuntzarako tresna izan beharko lukeela uste dugu: kirolaren bidez elkarbizitzako oinarrizko baloreak, euskara, berdintasuna, aniztasuna, parte-hartzea eta naturarekiko kontaktua lantzeko tresna; hezkuntza ez delako eskola edota familiaren ardura soilik”.

Horretarako, otsailaren 19an topaketak antolatu dituzte Zumaian. “Eskola Kirola balioen hezkuntzarako tresna izateko kontutan hartu beharreko klabe batzuk definitzen saiatuko gara; maila teoriko zein praktikoan”, adierazi dute.

Zumaiako Aita Mari aretoan 9:30ean hasiko da egitaraua: lehenengo zatian, Eskola Kirolaren inguruko marko teorikoa landuko dute, eta bigarren zatian, Eskola Kirola eraldatzeko esperientziak ezagutuko dituzte. “Oñati, Usurbil, Hernani eta Oarsoaldean eraldaketa prozesuetan parte hartu duten kideen esperientziak bilduko ditugu, mahai-inguru batean”, aurreratu dute. Dagoeneko, ireki dute izena emateko epea Oiherriren webgunean.

Izurriaren aurrean, hausnarketa

“Eskola Kirola, izenak berak dioen moduan, eskola kirola da, eta ez kirol eskola. Ez da haurrei kirola irakasteko tresna, edo ez luke hala izan behar behintzat”, uste dute Oinherrikoek. Eskola kirola “hezitzailea” izan behar dela diote, eta horretarako,  kirola helburu izatetik, “balioen hezkuntza lortzeko tresna” izatera pasa beharko litzatekeela; horretarako, “ezinbestekotzat” jo dituzte Eskola Kirolaren antolakuntzan parte hartzen duten ikastetxe, hezitzaile, udal eta gurasoen arteko “elkarlana” eta “komunikazioa”. 

Gauzak horrela, haurra eta bere beharrak (emozional, afektibo eta kognitiboak) Eskola Kirolaren erdigunean kokatzea eta zein balio landu behar diren adostea nahi dute, besteak beste: “Eskola Kirola balio hezitzaileetan oinarritzea nahi genuke. Haurren hezkuntzak eta baita helduenak ere, balio hezitzaileak ekarri behar dituela berekin uste dugu, bai edukietan eta baita egiteko moduetan ere. Aniztasunaren errespetua, parekidetasuna eta aukera berdintasuna dira horietako hiru; laugarrena berriz, bestearen onarpena, inklusioa”.

Egitaraua:

  • 09:30. Ongi etorria.
  • 10:00. Eskola kirolaren txapel teorikoa. Andu Martinez de Rituerto.
  • 10:40. Gipuzkoako Foru Aldundian azken urteetan hartutako norabidea.
  • 11:20. Atsedena.
  • 11:45. Herrien esperientzia elkarbanatzeko mahaingurua. Oñati, Usurbil, Oarsoaldea eta Hernani.
  • 13:00. Itxiera.
Etiketak: