COVID-19-ak umeen egunerokotasunean eragina izan duten eta duten aldaketa asko ekarri ditu gizartera. Osasun krisia kontrolatzeko, hainbat murrizketa egin dira, mugikortasunean zein harremanei dagokienean. Hainbat arlotako profesionalek ohartarazi dutenez, hala nola, osasun profesionalek, pediatrek, psikologoek eta hezitzaileek, egoera honek kalte egin diezaieke adingabeei, bai  ikuspuntu fisikotik, bai emozionaletik ere. Euskal Herrian ere, egoera berezi honek  eragindako ondorioak arlo akademikoan, emozionalean eta sozialean aztertu dira.  Normaltasun berriak ezarritako neurrien artean, adingabeen bizi-kalitatea eta ongizatea hobetzen duten proiektuak geldiarazi ditu. Esate baterako, Eskola Bideak (edo Caminos Escolares, Caminos Amigos, Eskolara Lagunekaz, Bizibideak…). 

Testuinguru honetan, Eusko Jaurlaritzako Osasun Publikoaren eta Adikzioen Zuzendaritzaren, Osasuna Sustatzeko Arloko arduradun teknikoek, Euskal Herriko Unibertsitateko (UPV-EHU), KideON ikerketa-taldeak eta  Haurren Hirien Sareak (Solasgune eta Innobasque), Txosten bat argitaratu zuten Otsaila hasieran,elkarlanean, guraso.eus egitasmoan txosten honi helduko diogu datozen egunetan.

ZERGATIK DA GARRANTZITSUA LAGUNEKIN OINEZ ESKOLARA JOATEA PANDEMIA EGOERAN EGON ARREN? “Pandemiari aurre egitea ez da osasun estrategia bat soilik, gizarte osoaren esku hartzea eskatzen baitu, Covid-19-arekin elkarbizitzen ikastea ahalbidetzen duena, pertsona ahulenak babesteko modu berriak diseinatuz, haurren eta gazteen hezkuntza eta garapen soziala sustatuz eta bizi kalitatea, interakzio soziala eta zaintza pertsonala hobetuz”.(“COVID 19: Una respuesta comunitaria para una pandemia social” Agiria, Covid-19 Osasun Komunitarioaren Behatokia.) Pentsa dezakegu haur bat, beste haur batzuekin batera eta bere joan-etorriak zaintzen ez dituen pertsona heldurik gabe, eskolara oinez joateak ez duela aldaketarik ekarriko. Baina haur horrek ematen duen pauso bakoitzarekin, bere ingurunea ezagutzen du, ikasi egiten du, hazi egiten da… Egunero egiten duen bide horrek bere buruarengan segurtasuna irabazten laguntzen dio, arduratsua izaten, eta berarengan konfiantza duten pertsona helduak daudela jakinarazten dio. Haurrak eskolara lagunekin oinez doazenean, berdintasun egoeran harremanak sortzeko eta elkar laguntzeko gai direla ohartzen dira. Azken batean, autonomia eta elkarrekintza pixkanaka garatzeko prozesuan laguntzen die.  Hau da dokumentu hau egiteko testuingurua, arrazoia eta abiapuntua. Bere idazketan, haurren autonomia berreskuratzeko konpromisoa partekatzen duten erakunde eta pertsona desberdinek parte hartu dute, elkarlanean. Kezkez haratago, osasun komunitarioarekiko eta gure herri eta hirien garapenarekiko interesetik. Lan hau, beraz, begirada eta ezagutza horiek elkar banatzearen emaitza da, jakin badakigulako, gaur egun bizitzen ari garen pandemia-testuinguru honetan, hamaika arrazoirengatik, lagunekin eskolara oinez joateak inoiz baino zentzu handiagoa daukala