Etxean egindako Tetrix jokoa proposatzen dizuegu. Eskulana egitea gustuko izango duzue, eta ondoren jolastea zer esanik ez! Adimena eskatzen duen jokoa da. Eta bota erronka etxeko helduei ere!

Materiala

  • Kartoizko bi arrautza-ontzi.
  • Pintura. Zazpi kolore.
  • Pintzelak.
  • Guraizeak edo kuterra.

Nola egin

1. Piezak markatu. Arrautza-ontzietako bat oinarria izango da eta ez dugu ukitu ere egingo. Bestea, aldiz, Tetrix piezak egiteko erabiliko dugu. Zazpi pieza sortuko ditugu. Arrautza-ontzia mozterakoan hanka ez sartzeko gomendatzen dugu arkatzarekin markatzea lehenengo eta kolorez gero. Adi, garrantzitsua da lan hau ondo egitea eta erraza da nahastea. 

2. Margotu piezak. Zazpi piezak ondo markatuta daudenean margotu egingo ditugu bakoitza kolore batekin. Ondo bereizteko moduko koloreak aukeratzea komeni da, eta kolore gutxi baditugu konbinatu daitezke. Esaterako, urdina puntu zuriekin eta abar… Gero, ondo lehortzen utzi.

3. Moztu piezak. Ez da lan erraza piezak apurtu barik ondo moztea. Hartu pazientziarekin eta txukun egin. Amaitukoan errepasatu bazterrak eta beharrezkoa bada margotu hobeto izkinak. Piezak ondo lehortutakoan prest duzu etxeko Tetrix jokoa. Ea pieza guztiak ondo kokatzen dituzun!