Nafarroako toki-entitateetako 28 euskara zerbitzuek elkarlanean sortu zuten era.eus webgunea. Euskaraz ikasten duten haurren gurasoei laguntza eta baliabideak eskaintzeko tresna eguneratu eta gomendagarria da. Seme-alaben ikas-prozesua osatzeko tresnak, baliabideak eta agenda argitaratzen dituzte eta gogoeta interesgarriak ekarri izan ditugu bertatik guraso.eus egitasmora. Hona hemen ikasturte hasiera honetan proposatzen duten hausnarketa.

Eskolatik kanpo ere…

Irailean sartu gara. Udako giroa eta patxada alde batera utzi eta errutinak berreskuratzea, lanean hastea eta eskolara itzultzea dagokigu. Nagia gainetik ezin kenduz gabiltzala, gainera datozkigu urteroko aferak: haurrek eskolarako behar duten guzia atondu beharra, bateko motxila, besteko mantala, liburu hau falta zaigula, iazko estutxea ezin topatu dugula, ikastetxetik ia egunero iristen hasten diren oharrak…

Bereziki ikasturte hasierako estres honetan, eskolak haurren bizitza osoa betetzen duela irudituko zaigu agian, baina, kontuz!, ez baita horrela. Umeak bertan urteko esna orduen % 15 baizik ez du ematen. Hortaz, eskolak betetzen duen funtzioa ukatu gabe, jar dezagun arreta beste % 85ean.

Tarte zabal eta informalago hori funtsezkoa da haurren bizitzan, nortasunaren eraikitzean, garapenean eta sozializazioan. Denbora horretan harreman eremuak zabaltzen dituzte, modu askeagoan ibiltzen dira eta erakargarri zaizkien jardueretan parte hartzen dute. Bizipen horietan euskarak presentzia ahalik eta handiena izatea komeni da, eragin handia izan baitezake. Izan ere, haurrek eskolan ikasitakoari jarraipena emateaz gain, hizkuntzaren beste erregistroak praktikatzeko gune aproposak dira.

Esaterako, eskola orduz kanpoko jardueretan izen emateko garaia da orain. Kirola, musika, dantza, ludotekak, bertso eskola… haurren gustuko jarduerak izaten dira. Horietan euskaraz aritzeko aukera baldin badute, gutxienez bi helburu beteko dira: bat, hizkuntzarekin dituzten harremanak eta esperientziak areagotzea; bi, hizkuntzaren beste erregistro batzuk (musika edo kirol arloko hiztegia, hizkera kolokiala…) landuko dituzte. Beraz, izena eman aurretik galde dezagun jarduera euskaraz egiteko aukerarik badagoen. 

Bestalde, parkea, plaza, atariak… haurrak sozializatzeko ohiko guneak dira, harreman askeetarako lekuak. Bertan ohiturak, jolasak, kantak… partekatzen dituzte, eta hizkuntza ere garatzen dute. Hortaz, espazio hauetan ere euskarak presentzia izatea garrantzitsua da. Ez da harritzekoa haurrek egoera horietan erdaretara jotzea, eta maiz helduon esku egon daiteke elkarrizketa eta jolas horiek euskarara bideratzea.

Etxean ere euskarari ahalik eta toki gehien egitea komeni da, komunikazio aberatsa izatea, solasaldi ugari sortzea eta haurrari mintzatzeko aukera ematea, adibidez. Eta, euskara begietatik ere sartzen denez, elkarri idazten dizkiozuen ohartxoak, erosketen zerrendak… euskaraz jartzea ideia bikaina izan daiteke. Halaber, euskaraz irakurtzea, euskal musika entzutea, euskarazko jolasak erabiltzea, pantailak euskaraz izatea… benetan lagungarri izanen zaizkio hizkuntzaren garapenerako. 

Zenbat alderdi hartu behar diren kontuan, ezta? Lasai, aholku sorta zehatz eta argigarria aurkituko duzue dekalogo honetan eta bideotxo honetan.