Euskadiko orkestra sinfonikoak, Donostiako Udalarekin elkarlanean, otsailean abiatuko ditu, berriz ere, Musika Gela programa eta eskola kontzertuak. Bizi dugun pandemia egoerara egokitutako saioak izango dira.

Emanaldiak Donostian izango dira. “2020-2021 ikasturterako proposamenak COVID-19 pandemiak eragindako murrizketengatik baldintzatuak datoz. Egoera dela-eta Haur Hezkuntzarako aurreikusita genituen kontzertuak bertan behera uztera behartuta ikusi dugu geure burua”, azaldu dute.

Lehen Hezkuntza neska-mutikoentzako proposamenak lotura estua da azken hilabeteotan bizitako konfinamendu egoerarekin. “Parodia bat proposatzen dizuegu: Living room music. Proposamen horretan gure orkestrako lau perkusionistek ohiko musika instrumentuetatik kanpo dauden objektuekin –koilarak, lanparak, erratzak…– sortzen den musikaz gozatzera eramango gaituzte”.

Aldi berean Beethoven 250 programarekin jarraitu du Orkestra Sinfonikoak. “Proposamen honetan Beethovenen sinfonia desberdinen zati esanguratsuak entzun ahal izango ditugu, hala berak utzitako ondarea baloratuz; izan ere, sortzaile honek modu miresgarri batean gainditu zuen bere entzumen urritasuna, gaur egun oraindik mundu osoko kontzertu aretoetan entzuten jarraitzen dugun soinu monumentua sortuz”.

Horrekin batera, lau entsegu ireki eskainiko ditu orkestrak. Aukera paregabea izango dira orkestra sinfoniko batek kontzertu bat nola prestatzen duen ezagutzeko.

Emanaldien egitaraua

  • Living Room Music. Egunak: otsailak 18, 19, 22, 23, eta 24. Ordutegia: 9:45ean eta 11.30ean. Lekua: Miramongo egoitzako auditorioa. Lehen Hezkuntzako neska-mutikoei zuzendutako hamar eskola kontzertu izango dira, orkestrako lau perkusionistarekin eta aurkezle batekin, Ana Egiazabal. Plaza kopurua erdira jaitsiko da eta 200 bat ikasle eta irakasle izango dira, burbuila taldeetan antolatuta.
  • Beethoven 250. Egunak: martxoak 23 eta 24. Ordutegia: 9:45ean eta 11.30ean. Lekua: Kursaal auditorioan. Lehen Hezkuntzako hirugarren zikloko eta Bigarren Hezkuntza ikasleentzako lau eskola kontzertu. 400 leku kontzertu bakoitzeko. Aurkezlea Ana Egiazabal eta zuzendaria Jaume Santonja.
  • Entsegu irekiak. Egunak: maiatzak 3 eta ekainak 11. Ordutegia: 11:00etatik 12:00etara. Lekua: Kursaal auditorioan. Lehen Hezkuntzako, Bigarren Hezkuntzako, Batxilergoko eta bestelako kolektiboetako entzuleentzako irekia. Edukiera: 400 pertsona entseguko.

Obren gaineko xehetasunak

  • LIVING ROOM MUSIC eskola kontzertuak. Koarentenak lau musikari harrapatu ditu urrutiko herri bateko apartamentu batean. Haien familiengandik urrun, derrigorrezko konfinamenduan eta harritasun eta urduritasunarekin musika egin dezaketen etxeko elementu guztiak aztertzen hasten dira: mahaiak, koilarak, abanikoak, ura, lanparak, loreontziak, eskailerak, zabor ontziak, eskuak, ahotsak… Kanpoko munduarekin duten kontaktu bakarra bizilagun begiluze bat da; haien egoera berean dagoen soprano bat. Ondokoek sortutako ikaragarrizko zarata horiengatik gogaitzen hasita dago eta etengabe enbarazu egiten hasten dena… Kontzertuak John Cage Ipar Ameriketako konpositorearen Living Room Music obrarengatik hartzen du izenburua.
  • BEETHOVEN 250 kontzertu sinfonikoa. Konpositorearen jaiotzaren 250. urteurrena dela-eta publiko gazteari Beethovenen sinfonien pasarterik gogoangarrienetako batzuk eskaintzen zaizkio emanaldian. Euskadiko orkestra eta Ana Egiazabal aurkezpen lanetan.
  • ENTSEGU IREKIAK. Musika ikasleentzako, Lehen eta Bigarren Hezkuntzako eta Batxilergoko ikasleentzako. Baita ere beste kolektiboentzako. Kontzertu baten aurretiko unetan orkestrak nola lan egiten duen gertutik ikustea, zuzendarien ohartarazpen eta iruzkinak entzutea, musikari, zuzendari eta bakarlarien arteko harremanak eta kontzertuetan ikusten ez diren beste alderdi eta osagai asko ezagutzea ahalbidetzen duen ekimena.

Argazkiak: Euskadiko orkestra sinfonikoa.