Hirugarren edizioa du, aurten, Zuk Zeuk lehiaketak. 14 eta 17 urte bitarteko gazteei dago zuzenduta eta ginkana erraldoi bat da non 15 laguneko taldeetan gazteek garapen iraunkorreko helburuen inguruko probak gainditu behar dituzten.

Duela hiru urte sortutako ekimena da eta orduan 200 bat gazte hartu zuten parte. Hirugarren edizio honetan 900 bat dira, eta aurreikuspen guztiak gainditu direla azaldu du lehiaketako antolatzailea den Feel My Way kooperatibako kide Aintzane Agirre.

400 eta 1.000 euro arteko sariak ematen dituzte probak modu txukunenean egiten dituztenen artean. Hiru hilabeteko liga jokatzen dihardute orain. Hogei talde onenak sailkatuko dira astebeteko iraupena izango duen finalera eta bost erronka osatu beharko dituzte.

Garapen iraunkorreko helburuekin lotutako erronkak izaten dira. Puri-purian dauden hainbat gairen inguruko kontzientziazio eta sentsibilizazio lana egiten dute lehiaketaren erronken bitartez eta guztia gazteen hizkuntzara ekarrita. “Gaur egun pil pilean dauden gaiak landuko ditugu Zuk Zeuk lehiaketan: aldaketa klimatikoa, berdintasuna‚Ķ Plataforman ehunka ekintza daude, talde bakoitzak nahi dituenak egiteko, eta horiekin puntuak irabaziz sailkapenaren lehenengo postuetara iristeko”. Horrez gain gazteek elkar ezagutzeko aukera dutela gogorarazten du Agirrek, eta ondo pasatzeko aukera ere bai. Online da aurten lehiaketa.

Babesleak ditu ekimenak. Gipuzkoako Foru Aldundi eta Laboral Kutxa dira bi nagusienak, baina entitate asko batu dira. Ikusgai daude guztiak webgunean. Guztiak direla beharrezkoak azaldu du Agirrek.

Aurtengo lehiaketa martxan da dagoeneko, baina adi egon jarraipena izango du-eta, seguru!

Youtube perfila du lehiaketak.

Bideoa iturria: Goiena telebista.