Maitane Aizpurua Marimunduko kontalariak Euskal Herriko mito, kondaira eta ipuinak kontatuko ditu urriaren 17an, larunbata, Gandiaga Topagunean. Familia giroan, ahozko ondarea ezagutzeko saioa izango da, eta aurrez izena emanda joan ahalko da.

Euskal Herriko mitologia eta ipuin zaharrak ezagutzeko aukera izango dute familiek larunbatean, Arantzazun. Izan ere, Arantzazu parketxeak eta Jentilbaratza Kultur Elkarteak Euskal Herriko mito eta ipuin zaharrak izeneko ipuin kontaketa saioa antolatu dute, Gandiaga Topagunean, 11:30ean. Maitane Aizpurua Marimunduko kontalari ataundarra arduratuko da istorioak kontatzeaz.

Euskal mitologiako elezaharrak, kondairak eta ipuinak izango dira saioaren ardatza, Jose Migel Barandiaranek jasotako ahozko ondarea ezagutzeko. Antolatzaileen esanetan, familian une atsegin bat partekatzeko eta giro goxoan istorio horietara hurbiltzeko aukera izango da.

Mitologia, adierazi dutenez, ipuin edo kontu fantastiko sorta ez ezik, errealitatea esplikatzen duten argibideen multzoa da. “Bizimodua arautzeko balio ez duenean baizik ez da bilakatzen mitologia kontu edo ipuin fantastiko bilduma, baina, orduan ere, ematen duen informazioa aintzat hartzeko modukoa da. Izan ere, beste azalpenik ezean, gertakari naturalei aurre egiteko nahiz euren buruak lasaitzeko, mitoak herritarrei ingurunea ulertzen lagundu dien lanabesa izan dira mendeetan zehar”, nabarmendu dute.

Parte hartzeko, aurrez erreserba egin behar da Gipuzkoanatura.eus webgunearen bidez. Sarrerak sei euro balio du pertsonako.

Ahozko ondarea, belaunaldiz belaunaldi

Ataunen urteak daramatzate euskal mitologia eta ipuin zaharrak berreskuratzen eta zabaltzen, Jentilbaratza Kultur Elkartearen bidez. Aizpurua bederatzi urterekin hasi zen Jentilen Etorreran parte hartzen, eta hamabirekin sorgin papera egiten. Gaur egun, Marimunduko sorginaren pertsonaia gorpuzten du, eta ipuin kontaketen bidez ere egiten du transmisio lana.