“Euskal pilotak ere badu bere karta-sorta”, adierazi du Gipuzkoako Euskal Pilota Federazioko (GEPF) presidente Itziar Lete Andonegik. Egin berri dute karta-sorta berriaren aurkezpena eta azaldu dute euskal pilotan oinarritutakoa dela eta Federazioaren mendeurrena dela-eta sortu dutela.

Daniel Carballo Ostolaza sortzaileak egin ditu irudiak, eta euskal pilotan oinarritutako karta-sorta osatu duela azaldu du: “Euskal pilotaren modalitate guztien ondarea ezagutarazteko eta zabaltzeko helburuarekin”.

Ezagutzen ditugun karten eredua hartu du oinarri horretarako, lau figurekin, eta horrela osatu ditu:

  • Urreak: pilotak dira.
  • Kopak: txapelketak eta sariak.
  • Ezpatak: xisterak, eskularruak, zesta, erremontea…
  • Bastoiak: palak, erraketa, xarea…

Karta-sortak eskuragarri daude 5 euroko prezioan Gipuzkoako Euskal Pilota Federazioaren egoitzan (Anoeta pasealekua, Kirol Etxea. Donostia).