Irakurketa, idazketa, portaera… zailtasunak sor daitezke, eta seguruenik aldagai asko egongo dira jokoan.

Captura de pantalla 2014-12-16 a las 12.43.02

Durangoko Eileike zentroko Maite Aldekoak eta Ana Jimenezek kontuan hartu beharreko hainbat gomendio egiten dizkiete gurasoei ikasturte hasiera honetan. Konparaketarik ez egiteko, eta umeen indibidualtasuna errespetatzearen alde agertu dira Anboto aldizkarian.

“Gazteen alderdi akademikoarekin lotuta batez ere bi arazo nabarmentzen dira: arreta goiztiarra (0-6 urte artean) eta laguntza psiko-hezigarria (6 urtetik aurrera)”, azaldu dute. 5-7 urte bitarteko umeen artean batik bat irakurketan eta idazketan agertzen dira arazorik gehienak. “Dislexia sarritan ematen den kasua da, esaterako. Portaera arazoak ere ikusten ditugu”.

Nerabeen artean autoestimu falta, segurtasun eza, eta lagunekin onak ez diren hartu-emanak aipatzen dituzte… “Sasoi batean nerabeek parkean jolasten zuten, baina orain, sare sozialak direla edo WhatsAppa dela, direna baino helduago izan gura dute, baina denek ez dute egoera horiei aurre egiteko gaitasun bera, eta hor sortzen dira arazoak”.

Aldagai asko

Aldekoak eta Jimenezek diote gurasoek ume guztiak desberdinak direla barneratu behar dutela. “Askotan konparaketak egiten dira, adibidez, parkean, eskolan zein neba-arreben artean, baina indibidualtasun hori errespetatzen ikasi behar dugu, eta baita konparaketa horietatik irtendako ondorioak erlatibizatzen ere”.

Gurasoek uste izaten dute arazo batek arrazoi bakarra duela. “Guk uste dugu aldagai asko egoten direla jokoan, eta ezinbestekoa dela azalpen hori gurasoei ere jakinaraztea. Kontuan hartu behar da, gainera, gazteak gaur daukan zailtasuna hilabete bi barru aldatu egin daitekeela, bai arloz eta bai intentsitatez”.

Artikuluaren iturria hemen.

Irudiaren iturria hemen.