Gipuzkoako Urola Garaia eskualdean dago honakoan proposatzen dizuegun txangoa. Antioko ermitatik, –Antiguako Andre Mariaren eliza izenez ere ezaguna– abiatuko gara. Iristeko Zumarragako kiroldegiaren parean dagon bide batetik bi kilometro egin beharko ditugu gorantz. Autoz egin daiteke bidea.

Aparkatu eta Beloki mendira abiatzea proposatzen dugu. Ermitaren ondoan Interpretazio Zentroa eta taberna-jatetxea daude. Baita ere komunak.

Egokitutako gunea da eta iturriak eta mahaiak ez dira falta, nahiz eta mahai hauetako asko egoera onean ez egon. Berriki egokitutako ibilbide zirkular batek inguratzen du magal guztia. Ikuspegi ederrak daude eta gainera tarteka-tarteka eskualdean garrantzitsuak izan diren jardueren inguruko gune egokituak daude.

Laster iritsiko gara Beloki mendi tontorrera eramango gaituen bidegurutzera. Lekua seinaleztatuta dago eta atseden gune bat dago bidegurutze horretan. Belokin metalezko gurutze handi bat eta kanpaia daude. Bertatik Zumarraga eta Urretxu nahiz Aizkorri eta Aralar mendilerroen ikuspegi bikaina dago. Bestalde, inguru honetan ehunka urte dituzten arte eta agin daude.

Berriz ere Antio ermita ingurura itzultzerakoan aukera dago hori bisitatzeko. Ia egunero zabaltzen dute baseliza, eta pertsona bat egoten da bertan azalpenak emateko gertu. Atean dago jarrita bisiten ordutegia.

Baseliza erromaniko-gotikoa da, eta barnealdeko zureria ikusgarriagatik da ezaguna. Monumentu izendatua dago, Sailkatutako Kultura Ondasuna. Harriz eta zurez egindako eraikin honek harlanduzko sei zutabe ditu, eta horiexek eusten dute zureria. Tronpeta itxurako leihoak ditu, gezileihoak, gotikoak.