Gaur goizean esnatu eta sareetako lehen bistadizoan topo egin dut gune honetan  “Lo leihoak haurretan” artikuluarekin eta haurren loaren inguruan kide ditudan CESI-koekin (Centro de Estudios del Sueño Infantil) partekatu dut kezka.
Azken aldian haurren loaren inguruan sortzen ari den olatu berriaren islada da loaren leihoen atzean dagoena. Orain urte batzuk Estivill metodoaz aritzen ginen konduktismoaren eta lo bakarrik egiten ikastearen inguruko “metodoen” bortizkeriaz solasten. Ikus hemen: https://youtu.be/i6_t100Nj2Y
Orain metodo hauen arriskuen inguruko kontzientzia zabalagoa dagoenez olatu berri bat sortu da metodo hauetatik apur bat urrunduz baina finean helburu berarekin: haurrak bakarrik eta helduak markaturiko ordutegi zein baldintzetan lo egitea. Irribarrez eta errespetuaren* etiketa jarriz baina loaren oinarri oinarrizko beharrei eta ezaugarriei erreparatu gabe. “Loaren entrenamendu” atseginagoa bilatzen dute baina konduktismoaren oinarrietatik.


CESI-ko kideekin batera, ekaineko azken astean sare sozialetan gazteleraz kanpaina eder bat garatu genuen #díadelsueñofeliz etiketarekin topatuko duzu, batez ere instagramen. Kanpainaren helburua ebidentzian eta errespetuan oinarritutako loaren garapen eta akonpainamenduaren oinarriak partekatzea izan zen.


Loaren leihoak izan zen deseraiki nahi izan genuen kontzeptuetako bat. Une honetan dugun ebidentziarekin ezin da inolaz zehaztu leiho horiek errealak direnik, lo beharrak pertsonaren araberakoak dira.
Loan, altuera eta pisuarekin gertatzen den bezalexe, behar eta ezaugarri desberdinak ditugu. Hemen ikus dezakezu une honetan erabiltzen den erreferentzia garrantzitsuena: https://www.ncbi.nlm.nih.gov/pmc/articles/PMC6267703/


Loaren pertzentilei dagokionean Iglowsteinen pertzentilak hartzen dira erreferentziazkotzat.
Loaren beharretan zuzenean eragiten du presio homeostatikoa pilatzeko abiadura da eta hori oso aldakorra da adin bereko pertsona taldeen barnean. Eguneroko erritmoa, estimulazioa, garapen unea, elikadura, faktore genetikoak… izango dira barne erlojuari zuzenean eragingo diotenak.


Zure haurraren loa ulertu, garatzen lagundu eta hobea izan dadin, ezinbestean errespetutik, bai behar fisiologiko zein emozionalei erreparaturik egitera gonbidatu nahi zaitut. Loa ez da entrenatu behar, eta aldi berean, egunerokoan gertatzen diren faktore asko eta askok eragiten diote. Lo uneetara ahalik eta baldintza egokienetan heltzean dago gakoa, eta zure haurrari eragiten dioten faktoreen identifikatzean.
Loaren inguruan ez dago arau zurrunik. Ez behintzat zientziak (eta zentzuak) une honetan dionearen arabera. 

Aurrez aipatu bezala CESI bidez eta nazioarteko Holistic Sleep Coaching plataformen bidez haurren loaren inguruko zientziaz ikasten eta errespetua oinarri-oinarrian ezarriz informazioa zabaltzen jarraituko dugu sareetan eta aurki, egoerak hobera egiten badu, berriro herriz herri ere bai.

Zalantzarik baduzu galdetu lasai eta erantzunik bada, gustura emango dizugu. 


Bitartean, eta uzten dizuten tarteetan, ondo lo egin.