Familientzako plana: ZUMAIAKO KOSTALDEA (Zumaia – Gipuzkoa)

Zailtasuna: ertaina / Iraupena: 2 ordu (joan) / Ibilbidea: 6 km  / Goibehea: – 200 metro.

Zumaiako kostaldea ikusteko aukera paregabea. Flysh-arekin eta itsas-labar ikusgarriekin gozatzeko aukera polita. Itziar eta Zumaia artean dagoen errepidetik Elorriaga auzora egingo dugu. Bertako atseden gunean utziko dugu autoa. Gune horretan komunak, iturri bat, mahaiak, ziburuak eta ibilbidean panel informatiboa dago. Lehenengo Elorriagako ibilbide zirkularra egingo dugu (2 km – 45 min – marka zuri-berdeak) eta Elorriagako begiratokira iritsiko gara. Atseden gunera itzulita Zumaiara doan bidea hartuko dugu GR-121 (marka zuri-gorriak). Baserri eta mahasti artean egingo dugu ibilbidearen lehen zatia.

Ibilbideak bidegurutze batera eramango gaitu, ezkerrean eserleku bat dago. Zuzen jarraituta bidetik egingo dugu Zumaiara. Ezkerreko bidexka hartuz gero itsas-labar artean egingo dugu Zumaiarainoko bidea. Bigarren aukera hori hartuta behera egingo dugu eta Algorrira iritsiko gara. Proposamena da San Telmo ermita bisitatzea eta Itzurungo hondartzan bainua hartzea.