‘Familia, futbola eta formazioa’ hitzaldia egin zuten Eibar futbol taldeko idazkari tekniko Fran Garagartzak eta Realeko formazio taldeen arduradun Luki Iriartek, Bergaran.

Fran Garagartza

Fran Garagartza

Zeintzuk dira gurasoek umeei transmititu beharreko balioak?
Guk lantzen dugun gauzetako bat da gurasoen itxaropenak. Izan ere, askotan, umeenak baino handiagoak dira. Bestetik, jorratu behar izaten da zer gertatzen den umeek ez dutenean jolasten jarraitzen edo ez direnean goiko taldera igotzen. Bide horretan ematen diren mezuek garrantzi handia  dute. Gure ustez, klubak, umeek eta gurasoek triangelu magikoa osatzen dugu. Eskutik helduta joan behar dugu. Umearekin ordu gehien pasatzen dituztenak gurasoak dira eta guk euren laguntza behar dugu. Bestalde, gurasoek jakin behar dute klubaren mezuak zeintzuk diren. Bakoitzak argi izan behar du, baina, zein den bere rola. Ni ezin naiz izan guraso, eta gurasoa ezin da izan entrenatzaile. Azkenik, esango nuke protagonista umea dela, eta, beraz, gurasoek ezin dutela partiduetan arreta eskatzen egon.

Egokia izaten da gurasoen jarrera?
Nire ustez, landu beharreko gauza da. Zalantzarik gabe, orain dela hogei urte baino gehiago mugitzen dira gurasoak, ia partidu guztietara joaten dira. Ez zait iruditzen hori txarra denik, baina iruditzen zait askotan ematen zaiola garrantzi handiegia jolasari edo kirolari. Bestalde, beste batzuetan gurasoen portaera ez da horren ona izaten. Nire ustez, askotan izaten dituzte gero betetzen ez diren itxaropenak, eta horrek arazoak sortzen ditu. Nahi izaten dugu umeak txikitatik hastea lehiatzen, formazioaren gainetik. Uste dut alderantziz izan behar duela. Horregatik, klubaren jarrera azaldu behar zaie gurasoei.

Itxaropen horiek eragina izango dute umeengan, ezta?
Zalantzarik gabe. Gurasoen mezua da gehien eragiten diena umeei, eurak direlako umeekin ordu gehien pasatzen dutenak. Ezin dugu pentsatu denak iritsiko direnik kirolari profesionalak izatera.  Garrantzitsuena da futbolaren bitartez balioak lantzea.

Irabazteko grina baino garrantzitsuagoa da hori lantzea?
Bai. Futbolean hasiberriak diren umeez ari gara. Formazioa da gure lehentasuna. Zalantza barik, futbol jokalariak dira, baina pertsonak. Eta lehengo pertsona da. Orduan, pertsonak formatuta baldin badaude, ezin dugu pentsatu lehiatzea denik garrantzitsuena.