Kikilisalda egitasmoaren ekimenez prestatu dituzte lau ibilbideok: Leitzan ‘Txaragorri’, Goizuetan ‘Antoka’, Areson ‘Otarre’ eta Aranon ‘Suro’. Jolasean hasteko, ibilbide hasieran dauden QR kodigoan kolore bat aukeratu behar da: ingurumena (berdea), elikadura (laranja), jarduera fisikoa (urdina) eta herria ezagutu (fuksia). Aukeratutako koloreko galdera guztiak erantzutea da erronka. Galdera irakurri, erantzuna pentsatu eta asmatu duten jakin nahi dutenek hurrengo balizara joan behar dute.

Kikilisalda 2019. urtean gizarte zerbitzuak, Cederna Garalurrek, eta kontsumo, hezkuntza zein kirol arloko zenbait eragilek elkarlanean sortutako egitasmoa da. Helburua da Leitzan, Goizuetan, Areson eta Aranon elikadura, ariketa fisikoa eta ohitura osasuntsuak bultzatzea eta adin txikikoen obesitate tasa murriztea.

Dagoeneko hainbat kanpaina egin dituzte eta aurten, familian eta lagunen artean ongi pasatzeko, ingurua ezagutzeko eta ariketa fisikoa egiteko aukera eskaintzen duen proposamena egin dute. 

Iturria eta argazkiak erran.eus