Tokikomen X. urteurreneko jardunaldiak egin zituen martxoaren 24an Getxon, eta komunikazioko zenbait adituk hartu zuten parte hitzaldietan, tartean, EHUko irakasle eta NOR taldeko ikerlari Bea Narbaizak. Ikusiker behatokiaren datuak jarri zituen mahai gainean eta ehunka ikaslerekin egindako inkesten datuek ondorioztatzen dute sare sozialen kontsumo masiboa egiten dutela.. Azaldu zuenez, Hego Euskal Herriko gazteen ia %100ek du Instagrameko kontua; unibertsitateko ikasleek kasuan, egunean 18 aldiz sartzen dira eta bakoitzean, 17 minutuz kontsumitzen dute.

11-17 urte bitartekoen kontsumoa, baina handiagoa da. Denera 23 aldiz sartzen dira egunean, eta aldi bakoitzean 26 minutuz. Instagrami, ordea, beste sare sozial batzuetako orduak gehitu behar zaizkiela adierazi zuen Narbaizak, TikToken ia ordubete pasatzen baitute egunean eta Whatsapp nahiz YouTube ere asko erabiltzen dituzte.

Inkesta horien bidez ondorioztatu dute, gainera, hirutik bik sare sozialak erabiltzen dituela albisteak jasotzeko.

Streaming plataformak ere gora

Unibertsitateko ikasleen%40k zuen Netflix plataforma pandemiaren aurretik; baina orduz geroztik datua asko handitu da eta Bea Narbaizaren esanetan, ordainpeko zerbitzuak normalizatu egin dira gazteen artean: “Fikzioa ikusteko, streaming plataformak erabiltzen dituzte batez ere”.

Narbaizak beste ondorio bat plazaratu zuen: “Sakelakoan, edukietara zuzenean doaz, aplikazioen bidez. Horrek baldintzatu egiten du zer eduki kontsumitzen dituzten». Youtubeko proposamen ataletik doaz sarri edukietara. «Baina gazte askok ez dituzte euskarazkoak ezagutzen. Hortaz, jakinarazi egin behar zaie euskarazko edukiak badaudela”.