Gipuzkoako Foru Aldundiak aurkeztutako GazteAkt ekimenaren azken inkestak gazteen ongizate emozionalaren inguruko hainbat datu esanguratsu utzi ditu. Lurraldeko 2.000 gaztek baino gehiagok parte hartu dute azterketan, eta emaitzek erakusten dute ongizate emozionala gazteen kezka nagusietako bat dela.

Inkestaren arabera, gazteen %63k euren ongizate emozionala “ondo” edo “oso ondo” baloratzen du, baina %25ek 5etik beherako puntuazioa eman diote euren egoerari. Halaber, egunerokoan gehien errepikatzen diren emozioak neke emozionala (%60), antsietatea (%58) eta estresa (%52) dira.

Osasun mentalaren inguruko tabua bizirik

Daturik deigarrienetako bat da gazteen %27k adierazi duela ez duela norengana jo emozionalki gaizki sentitzen denean. Era berean, %31k ez du bere burua talde, sare edo komunitate baten parte sentitzen. Laguntza eskatzen dutenen artean, lagunak (%31) eta senideak (%25) dira erreferentzia nagusiak.

Osasun mentalaren inguruko pertzepzioari dagokionez, parte-hartzaileen %88k uste du gai horri buruz hitz egitea oraindik ere tabu dela. Horrek erakusten du sentsibilizazioan eta normalizazio sozialean sakontzeko beharra dagoela.

Lan-etorkizuna kezka iturri

Presio-iturriei buruz galdetuta, gazteen %45ek lan-etorkizuna aipatu du kezka nagusi gisa. Ondoren datoz ikasketak (%24) eta eguneroko bizitzako bestelako alderdiak (%24). Bestalde, %20k sare sozialetako konparazioa identifikatu du presio-faktore garrantzitsu gisa, eta %18k adierazi du presioa sentitzen duela bere bizitzako esparru guztietan.

GazteAkt ekimena iazko urrian jarri zen martxan gazteen iritziak eta proposamenak jasotzeko. Ordutik, 5.000 gazte baino gehiagok parte hartu dute prozesu ezberdinetan, eta azken lanketa honek gazteen ongizate emozionalaren egoerari buruzko argazkia eskaini du.

Inkestaren emaitzek agerian uzten dute gazteen artean ongizate emozionalarekin lotutako erronkek presentzia handia dutela, bereziki laguntza-sareen gabeziari, presio sozial eta akademikoei eta osasun mentalaren inguruko estigmei dagokienez. Aldundiaren arabera, emaitza horiek “prebentzioan eta komunitatearen indartzean oinarritutako ekimenak garatzeko beharra” berresten dute.