Asteazkenean EAEn indarrean sartu zen araudiak eskola-kiroleko entrenamenduak baimentzen ditu, baina sei pertsonako taldeetan egiten bada, eta aldagelak erabiltzen ez badira. Gainera, hori 14 egunetako intzidentzia-tasa 100.000 biztanletik 500ekoa baino txikiagoa den herrietan egin ahalko da soilik. Aurrerapausoa da, baina Bultza Kirola Euskadi plataformarentzat ez da nahikoa. Horrela azaldu du Gorka Garcia plataformako kideak:

Dekretu berriak entrenamenduak baimendu ditu. Nola ikusten duzue?

Aurrerapausoak beti dira onak.  Abenduan kirol federatua baimentzea izan zen lehenengo pausua, eta orain eskola-kirolarena ere etorri da, beste gauza batzuekin batera. Pozik gaude, baina ez da nahikoa.

Azaro hasieran sortu zenuten plataforma; hain zuzen ere, eskola-kirola abian jar zedin eskatzeko. Nola izan zen?

Eskola-kirola debekatu zenean, azaroaren 7an, elkarte batzuetako arduradunek WhatsApp talde bat osatu zuten. Lauzpabost ziren hasieran, baina apurka-apurka jendea batzen joan zen eta Telegram talde bat egin zen. Egun, ia 550 guraso-elkarte eta kirol-klub-etako kideak gaude ekimenean. Gure helburua eskola-kirola berriz abiatzea zen, eta orain, besteak beste, ez etetea da.

Zergatik da hain garrantzitsua eskola-kirola?

Martxotik neska-mutikoak ez dute kirola erregulartasunez egiteko aukerarik izan. 9-10 urteko umeak ez dira bakarrik kalera irteten kirola egitera eta kiroldegietara ere ezin dira bakarrik joan. Hortaz, gurasoak ez badira kirolariak edo ez badute jarduera fisikorik egiten, egoera honetan, haurrek ere ez dute egingo.  Helduok aukera asko ditugu, baina umeek… Etxean geratzea, telebista ikustea, bideo-deiak egitea…

Kalera badoaz eta terraza batean egonez gero, agian inguruko haurrekin jolastuko dute, eta hori eskola-kirola baino arriskutsuagoa da; ez baitituzte behar diren neurriak hartuko.

Hortaz, ohitura sedentarioak indartu egin dira eskola-kirola etenda egon den bitartean?

Bai eta hori ikusi egin da osatu genuen ikerketan. 3.000 erantzun jaso genituen eta ondorioak argiak dira. Eragin fisikoari eta mentalari dagokionez, inpaktu oso negatiboa izan du etenaldiak. Gainera, %10ek kirola egiten jarraituko ez dutela adierazi zuten. Bestalde, ohiturak aldatzerakoan, haurrek ez zuten lagunekin horrenbeste jolasten eta sozializatzeko arazoak ere ekarri ditu horrek.

Gurasoek ere sumatu dute hori?

Jakina. Gainera gauza bat oso erraz ikusten da: kirola egitean, barruan dugun dena erretzen da, eta haurrak lasaiago egoten dira bai etxean eta bai eskolan.

Egoera honetan, zer eskatzen diezue agintariei?

Kirola ezinbestekoa dela uste dugu, eta hortaz, hezkuntzaren edo kultur jardueren pisu bera izan dezan eskatzen dugu. Neurriak betetzen badira, kutsatzeko arriskua oso murritza da: %0,3 inguru. Horregatik, intzidentzia-tasa 500etik gorakoa duten herrietan ere eskola-kirola mantentzea eskatzen dugu; Europa mailan eta Espainiar Estatuko lurralde gehienetan egiten denari jarraitzea, alegia.

Segurtasun neurriekin, haurrek eta nerabeek kirola egiteko aukera izan behar dute. Kirola osasuna dela esan da beti, eta orain, osasuna inoiz baino garrantzitsuagoa denean, kirola egiteko aukera kentzen digute.

Etiketak: