30. urteurrena ospatzen duen Hiesaren kontrako T4 elkarteak argitaratu du bideoklipa Bizkaiko Foru Aldundiaren finantzazioarekin eta Aiora Renteriak (Zea Mays), Mad Muaselek, Odd Poixonek eta Yogurinha Borovak sinatuta.

Bizikidetza, errespetua eta aniztasuna moduko balioak aldarrikatzen ditu eta taldean lan egiteko tresna izan nahi du kantuak, gaur egungo musika oinarri hartuta eta kulturarteko elkarlaneko proiektu baten esparruan kokatuta. Horrekin batera begirunez abesteko eta dantzatzeko modu bat bultzatzea du helburu.

Bultzatzaileek adierazi dute arreta erakartzea eta ezarritako diskurtsoa aldatzen eta eskemak hausten lagundu nahi dutela kantuaren bitartez “norbanakoarekin nahiz besteekin begirunetsua den sexualitate osasungarri eta atsegingarria sustatzeko (…) Hain zuzen ere hortxe dago sexu-heziketa ona sustatzeko gakoa, geure burua gizon eta emakume gisa onar dezagun eta, hortik abiatuta, gainerakoak onar ditzagun, aniztasunaren eta begirunearen balioaz jakitun. Ondorioetatik lan egiteak (sexu-transmisiozko infekzioak, aniztasunarekiko fobiak, genero-indarkeria, bullyinga… aipatzeak) inpaktu txiki eta okerragoa dauka, garen horri, aniztasunean, desberdintasunean eta aberastasunean egiten dugun ekarpenari eta norbere burua zein gainerakoak ondo tratatzeak sorrarazten duen ongizateari balioa ematetik lan egiteak baino”.

Goza:tu plataforma digitaletan dago dagoeneko. Bideoklipean, aipaturiko artistekin batera hartu dute parte Margotu zentroko gazteek eta Barakaldoko Wild Dance Project dantza-akademiako dantzariek.