Taupa euskaltzaleen mugimenduak Eusfera ekimenaren azken xehetasunak aurkeztu ditu. Maiatzaren 7tik 17ra bitartean gauzatuko da, Euskal Herriko 100 bat herritan. Ekimenaren helburu nagusia argia da: haurren testuinguru linguistikoan eragitea, haur bakoitzaren unibertsoa euskaldunagoa izan dadin. Izan ere, hezkuntza eragileekin eta euskaltzaleekin izandako harremanetan kezka partekatu bat identifikatu dute: gero eta gehiago nabaritzen da erderek haurren unibertsoetan duten presentzia eta eragina handitzen ari dela, bereziki eskolatik kanpoko eremuetan: hala nola, aisialdian, telebistan edo pantailen erabileran.

Kezka horri erantzunez, Eusferak euskara erabiltzeko baliabideak eta urratsak emateko bideak proposatuko dizkie familiei. Gainera, ekimenak guraso guzti-guztientzat “ateak zabalik” izatea azpimarratu dute; izan ere haurren unibertsoa euskaldunagoa izatea nahi duten guraso guztiek parte har dezakete, euskaraz jakin ala ez.

Ekimena bera ondo kokatzeko, Uxue Izko Berastegik Taupako kide eta ekimenaren koordinatzaileak Eusfera Taupa mugimenduaren egiteko nagusiei bide ematen dien ekimen gisa aurkeztu du. “Taupan argi dugu gure helburu nagusia euskararen erabilera sendotzea eta horretarako aukerak eskaintzea dela. Eta euskara gero eta gehiago erabiltze aldera, ezinbestekoa dugu gizarte- aktibazioa”, azaldu du. Testuinguru horretan sortu da Eusfera, 0 eta 12 urte bitarteko haurren gurasoak aktibatzeko eta, haiekin elkarlanean, haurren inguruan euskarak presentzia gehiago izatea bilatzeko.

Parte-hartzeko bi bide

Maiatzaren 7tik aurrera, familiek bi modu nagusi izango dituzte ekimenean murgiltzeko.
Alde batetik, etxean etxekoekin egiteko “misioak” edo proposamenak egongo dira. Misio horiek haurren unibertsoa osatzen zortzi planetetan (ipuinen planeta, pantailen planeta, sormenarena…) banatuta daude, eta familia bakoitzak bere ezaugarrietara egokitutako erronkak jasoko ditu Eusferaren webguneko galdetegi labur bat beteta. Misio horiek eskuragarri egongo dira Euskal Herri osoko gurasoentzat.

Beste alde batetik, “Euspazioak” egongo dira: herriz herri antolatuko diren eta euskaraz hitz egiteko aproposak diren familientzako elkarguneak. Aisialdiari lotutako proposamen dibertigarriak eta gozagarriak izango dira, herri bakoitzak bere errealitatera moldatuta antolatuko dituenak.

Dagoeneko Arabako, Bizkaiko, Gipuzkoako, Lapurdiko, Nafarroako eta Nafarroa Behereko 100 udalerri, auzo eta kuadrilla inguruk bat egin dute, eta antolatzaileek herrietako deialdietara adi egoteko eskatu dute. “Parte hartuko duten herrien zerrenda jada Eusferaren webgunean, Gurasoen txokoan, dago, eta Euspazioen berri ere bertan emango dugu, data hurbildu ahala”, azaldu du Izkok.

Komunitatearen eta gurasoen rola

Ekimena tokian toki antolatzen ari diren taldeen izenean, Getxoko Egizu euskara elkarteko Fabio Perez Lasso de la Vegak azaldu du euskararen erabilera sustatzea ez dela soilik eskolaren edo erakundeen ardura, komunitate osoarena baizik. “Eusfera bezalako ekimenak beharrezkoak direla iruditzen zaigu. Ez dira soluzio magikoak, baina bai bidean aurrera egiteko tresna eraginkorrak. Garrantzitsuena da mugimendua sortzen dutela, kontzientzia pizten dutela eta jendea aktibatzen dutela”, adierazi du. Gurasoek umeen erreferente nagusietakoak direnez gero, etxean sortzen diren ohiturek hizkuntza erabileran duten pisuaz ohartarazi du, ilusioa pizteko gaitasuna ere baduen ekimen honen balioa azpimarratuz.

Ikuspegi horrekin guztiz bat egin du Jon Txarroalde Antolin guraso parte-hartzaileak. Arrigorriagako errealitatetik abiatuta, gogorarazi du haurren unibertsoa eskola baino askoz zabalagoa dela eta euskara biziarazteko sare bat eraikitzeko premia dagoela. “Askotan, euskaraz gehiago eta hobeto bizi nahi dugun arren, ez dakigu nola egin, edo oztopoak aurkitzen ditugu bidean. Eusferak aukera ematen digu pausotxo bat emateko komunitate gisa, gure auzo eta herrietan”, nabarmendu du.

Azkenik, argi utzi du haurrek ikusten dutena imitatzen dutela, eta gurasoen esku dagoela euskara hizkuntza baliagarria eta naturala dela transmititzea eredu emanez bai erabilerari dagokionean, baita hizkuntzaren aurrean daukagun jarreraren inguruan ere.