Mondragon Unibertsitateko Humanitate eta Hezkuntza Zientzien Fakultateak iaz haur eta gazteendako euskaraz kaleratutako 225 liburu aztertu ditu, eta 2022ko Haur eta gazte literatur gida kaleratu du. Bere baitan ditu liburu gomendagarriak, oso gomendarriak eta zerrenda berezia, eta sailkapen hori egiteko bizkuntzaren erabilera, literatura kalitatea eta gaien tratamendua aztertu dituzte, besteak beste.

Zortzi erakundetako hamalau profesional aritu dira gida osatzen, liburuzainak eta arloan adituak diren irakasleak, eta tartean dira Debagoienkoak ere: Mondragon Unibertsitateaz gain, jardun honetan aritu dira Aramaioko, Bergarako, Eskoriatzako eta Oñatiko udal liburutegiak, Aretxabaletako Kurtzebarri ikastetxea eta Eskoriatzako Luis Ezeiza Herri Eskola.

Ezarritako adina

2022an haur eta gazte literaturan euskaraz argitaratutako liburu guztiak irakurri dituzte adituek, eta baita adin tarte bat esleitu bakoitzari ere. Halere, adierazi dute “orientagarria” dela: “Erritmoak, haurren zaletasunak eta abar sailkaezinak dira. Gure ustetan, haurrek liburuak askatasunez aukeratzea oinarrizkoa da, eta, funtsezkoa, irakurzaletasuna sortzeko”.