Guztira, 2.300 produktu eta 100 kultur ekitaldi baino gehiago batuko ditu aurtengo ezohiko Azokak, eta horietako asko izango dira etxeko txikienei zuzendutakoak.

55. edizioa berezia izango da pandemia egoera dela-eta, baina kultur eskaintza beti bezain oparoa izango da. Azokako produktuak erosteko, katalogoa sarean dago eta hilaren 4tik 8ra egin ahalko dira erosketak. Gainera, aurreratu dute lehenengo mila erosleei aurtengo kartelaren irudiarekin egindako poltsa oparituko dietela eta 45 eurotik gorako erosketa egiten dutenek ez dutela bidalketa-gasturik ordaindu beharko.

Familientzako ikuskizunak streaming bidez

Mugikortasunean dauden murrizketak ere jasan beharko ditu Azokak aurten, baina Durangoko Landako eta Plateruena guneetan eta Euskal Herriko gainerako herrietan egingo diren ikuskizunak estreaming-ez ikusi ahal izango dira.

Familientzako hamaika ikuskizun, kontzertu eta  egingo dira. Besteak beste, honako hauek:

Larunbata (abenduak 5)

Koralaren distira (ipuin kontaketa) Maite Marquezek ilustratu, eta Kris Etxabek idatzitako album ilustratua izango da protagonista. Bertan, kutsadurak, plastikoek eta klima-aldaketak ozeanoetan duten eraginari buruzko hausnarketa sustatuko da. Azaldu dutenez, kolorearen bidez, koralezko uharriak zaintzearen beharra jakinarazten zaie umeei. 10:30ean hasiko da.

Itsas hariak (antzerkia): itzal-antzerkiaren teknika erabiliz sortutakoa da, eta eraikin berean bizi diren bi neskatoren arteko harremana kontatzen du. Koronabirusa dela-eta etxean konfinaturik egon arren, modu berezia sortuko dute elkarrekin komunikatzeko. Lur Euskal Herrikoa da eta Kristel Boliviakoa, baina duela gutxi bere familiarekin etorri da. Honek euskaraz gero eta hobeto hitz egingo du, bere lagun berriarekin izango dituen elkarrizketei esker. Kilimar Xuxurlak-eko Celeste Agüero eta Garazi Basterretxeak 10:30etik 11:30era eskainiko dute saioa.

Igandea (abenduak 6)

Laino Txiki, egizu negar poliki  (ipuin kontaketa): Xabier Etxaniz eta Monika Arratibelek sortutako ipuin kontaketa da; 3 eta 6 urte bitarteko haurrei zuzendutakoa. 10:30etik 11:30era eskainiko dute.

Bartoxeko Olentzero (irakurketa): Antton Kazabonen liburua izango da irakurketako protagonista. Bertan kontatzen da Maddi jada ez dela Olentzerorekin izutzen; ez behintzat Bartoxeko Olentzerorekin. 3tik 6 urtera arteko umeentzat dago zuzenduta saioa, eta 10:30ean hasiko da.

Pirata Arratoia (film emanaldia): Arratoi pirata bide-lapurren artean gozo zaleena da. Bere zaldiaren gainean, bidean aurkitzen duen bidaiari guztien janaria lapurtzen aritzen da, baina bera baino maltzurragoa den norbaitekin topo egingo du. Zineuskadik eskainiko du 14:30ean, eta 55 minutu iraungo ditu.

Astelehena (abenduak 7)

Ene Kantak (kontzertuak). Bi kontzertu eskainiko dituzte:  hilaren 7an eta 8an. Astelehenekoa 12:00etan izango da, eta asteartekoa, 10:30ean.

Asteartea (abenduak 8)

Liburu baby kluba (ipuin kontaketa). Familia giro goxoan literaturaz, abestiez eta jokoez gozatzeko aukera eskainiko du Elisabeth Etxebeste ipuin kontalariak. Plazeraren bitartez, umeengan txikitatik eta beraien familiengan literatura, musika, artea eta naturarekiko interesa piztea izango da saioaren helburua. 0 eta 3 urte bitarteko umeei zuzendutakoa da, eta 10:30etik 11:30era izango da.

Miru, zoriontsu izateko sortu gara (kontzertua). Kiliklon Ekoizpenak-en eskutik, Miruk disko berria aurkeztuko du, eta ikuskizuna emango du. Miruren asmoa autoestimatzea zer den argi uztea izango da; hau da, norberak bere burua maitatzean datzala. 10:30ean hasi eta 11:30ean amaituko da.

Ikasle goiza ere bai

Urtero bezala, Azokako lehenengo egunean, hilak 4, Ikasle Goiza antolatuko da, eta hainbat ikastaro antolatu dituzte online, ikastetxeetan egiteko: bikoizketa tailerra, blender, nola sortu liburu bat, ilustrazioa, yogipuinak…. 5 eta 16 urte bitartekoentzako eskaintzak izango dira

Horrez gain, beste ekimen batzuk ere izango dira goizean zehar. Oihan Vegak eta Oizeder Mayo kazetariek elkarrizketa saioa egingo dute hainbat sortzailerekin. Liher musika talde donostiarra, Kai Nakai abeslaria eta Erika Elizari eta Aitor Arana idazleak izango dira bertan.

Etiketak: