Iritsi da uda, eta horrekin batera, iritsi da baita ere hondartzara edota igerilekuetara joateko garaia. Sasoi honetan haurrak eguzkitik babestea oso garrantzitsua da eta kontuan hartu beharreko hainbat gomendio jaso ditugu segidan.

Eguzki-babeslea, umearen adinaren arabera aukeratzea komeni izaten da, eta eguzkia saihestu beharra dago haur txikien kasuan.

Sei hilabete baino gutxiagoko haurrek ez dute eguzki-babesik erabili behar. Izan ere, larruazala sentikorregia eta heldugabea dute, eta krema horiek ez daude horietan probatuta; beraz, burua txanotxo batekin estali eta gorputza arropa fin eta freskoarekin babestea aholkatzen du, Lucia Galan pediatrak. Gaineratzen du ez duela gomendatzen hondartzara sei hilabete baino gutxiagoko haurrak eramatea, dena dela, egunaren lehen edota azken orduan, eguzkiak hain gogotsu jotzen ez duen momentutan, joan daitekeela esan du.

Haur txikienen azala erraz erretzen da eta tenperatura handien aurrean deshidratatzeko arriskua ere badute, beraz, kontu handiz ibiltzea gomendatzen du. Gainera, eguzkitakoaren azpian egon arren, eguzki-erradiazioa hondarrean islatzen da, % 30 arte, eta errazago erre daitezke.

Zein motatako kremak eta eguzki-babesak daude haurrentzat?

  • Iragazki fisikoak edo mineralak
  • Iragazki kimikoak edo organikoak
  • Iragazki mistoak (fisikoak eta kimikoak)

Horietan guztietan garrantzitsua da ontzian espektro zabalekoak direla egiaztatzea, hau da, UVA eta UVB izpien aurrean estaltzen dituztela ikustea –guztiak ez dira berdinak–.

Esan bezala, sei hilabetetik beherako haurrei ez zaie eguzkitako kremarik jarri behar; izan ere, eguzki-esposizioa luzaroan saihestu behar da, hau da, ez lukete hondartzara joan beharko. Azala oso sentikorra dute, eta ezin da bermatu jartzen dioguna ez xurgatzea. Beraz, larruazala arropa freskoz estaltzea, txanotxo bat erabiltzea, itzalpean jartzea eta paseoak ematea da aproposena, Galanen hitzetan.

Sei hilabetetik bizpahiru urtera bitartean, batez ere urtebetetik beherakoetan, iragazki fisikoak edo mineralak aukeratzea gomendatzen du pediatrak. Krema horiek aplikatzean, izpiek errebotatu egiten dute, hau da, eguzki babesleak izpiek erradiazioa azalean sartu gabe islatzea lortzen dute. Aplikatzen dituzun une beretik dira aktiboak, baina ez dira urarekiko hain iraunkorrak. Aplikazioa kimikoekin baino sarriago errepikatu behar izaten da. Hala ere, egokiak dira umeak bizpahiru urte baino gutxiago baditu, eta baita larru sentikorretan edota dermatitis atopikoa duten haurretan ere.

Iragazki kimikoak hiru urtetik gorakoetan erabiliko dira, Espainiako Dermatologia Akademiak gomendatu bezala. Kontuan izan 30 edo gehiagoko babesa izan behar dutela, ahal dela 50 eta normalean haurren irudiak ere izaten dituzte ontziek. Eguzki-krema horiek aplikatu eta hogei minutura eragiten dute, eta, beraz, ez itxaron hondartzara edo igerilekura iritsi arte, jarri etxetik irten aurretik. Gomendatzen dute baita ere urarekiko iraunkorrak diren babesleak aukeratzeko; hala ere, bizpahiru orduz behin komeni izaten da berriz ere eguzki-babeslea botatzea, uneoro babestuta daudela bermatzeko.

Iazko eguzkitik babesteko kremak erabil daitezke?

Irekita baldin badaude, ez dute gomendatzen. Behin irekita hamabi hilabete irauten dute, beraz berritu beharra egoten da.

Ohikoa izaten da haurrek azaleko minbizia edo melanoma izatea?

Oso arraroa da, baina eguzki erradiazioa metatu egiten da. Larruazalak memoria du, ez du ahazten. Kalkuluen arabera, azaleko minbizien % 80 ekidin daitezke haurtzarotik eguzki-babes egokia balego. Horixe dio Galan pediatrak, eta gaineratzen du melanoma minbizi oldarkorra dela eta, zoritxarrez, kopuruak gora egin duela azken urteotan. Beraz, bereziki udan haurren azala babestea garrantzitsua dela adierazi du.