Haurrak iraindu egiten nau, nola jokatu behar dut zuzentzeko?

Haur batek bere gurasoak iraintzeko ohitura hartzen badu, beste edonor iraintzeko gauza izango da. Baina nola zuzendu jarrera hori? Entrepadres atari digitalean ematen duten lehenengo gomendioa da hasiera batean behintzat ez larritzeko eta umearekin ez haserretzeko. “Ume txikiek inguruko helduengandik ikasten dituzte horrelako hitzak, eta erabiltzen dituzte esanahia oso ondo ulertu barik”. Beraz, lehenengo pausoa litzateke haurrarekin hitz egitea. “Galdetu zergatik erabili duen hitz hori, esan nola sentitu zaren entzundakoan, eta azaldu berak erabilitako hitzak zer esanahi duen. Berebiziko garrantzia du haurrak irainaren esanahia ulertzea”, diote.

Iraintzea, hitzez jotzea

Haurrek euren haserrea bideratzen ikasi behar dute eta helduak gara bide horretan lagundu behar diegunak. “Ez iraintzeko ulertu behar dute hitz horiek min egiten dutela”. Azaldu diezaiekegu, esaterako, iraintzea hitzez jotzea dela.
Adituen esanetan emandako azalpenak ulertuz gero eta iraina gertatzen den guztietan gurasoen edo hezitzaileen oharra jasoz gero, laster zuzenduko da jarrera okerra. Garrantzitsua da ez haserretzea eta umea bera ez iraintzea.

Eredu izan

Esan gabe doa alferrikakoa dela umea zuzentzea guk geuk okerreko jarrerak baditugu. Umeek ikusitakoa eta entzundakoa errepikatzen dute, eta guk geuk hitz iraingarriak erabiltzen baditugu, umeak berdina egingo du. Gehienetan hau izaten da haurraren jarrera desegokien iturria.
Irainak probokatzeko erabiltzen baditu ez aztoratu. Helburua lortzen badu errepikatu egingo du zuzendu nahi dugun jarrera hori. “Erakutsi umeari hitz egokiekin gehiago lortzen dela, eta irainekiko arau eta muga zehatzak ezarri etxean”, gomendatzen dute adituek.

Albistearen iturria hemen.

Argazkiaren iturria hemen.