Eusko Jaurlaritzak 2026ko Ebaluazio Diagnostikoaren emaitzak aurkeztu ditu eta horren arabera, ikasleen konpetentzien bilakaera orokorra “positiboa” izan da. Emaitzek, halaber, ekitatearen arloan egindako “aurrerapenak” erakusten dituztela adierazi dute Eusko Jaurlaritzatik: testuinguru sozioekonomikoari lotutako aldeak murriztu egin dira, eta atzerritar jatorriko ikasleen emaitzek ere hobera egin dute.

Ebaluazioa 10.642 ikasleren laginean egin da, 252 ikastetxe publiko eta itundutan. 5.162 ikasle Lehen Hezkuntzako 6. mailakoak izan dira eta 5.480 DBHko 4. mailakoak. Laginaren hautaketa EUSTATek egin du, EAEko hezkuntza-sistemaren ordezkaritza bermatzeko estatistika-irizpideekin.

Hobekuntza hainbat konpetentziatan

Lehen Hezkuntzako 6. mailan, euskarazko hizkuntza-komunikaziorako konpetentziaren emaitza 3 puntu hobetu da 2024ko ebaluazioarekin alderatuta, eta matematikarako konpetentziarena 2,5 puntu igo da. Zientziarako konpetentziak antzeko emaitza izan du; gaztelaniazko hizkuntza-komunikaziorako konpetentzian, berriz, 2,3 puntuko jaitsiera izan da.

DBHko 4. mailan, bilakaera nabarmenagoa izan da. Gaztelaniazko hizkuntza-komunikaziorako konpetentziak 7 puntu egin du gora, eta zientziarako konpetentziak 3 puntu inguru. Euskarazko hizkuntza-komunikaziorako konpetentziaren emaitza egonkor mantendu da.

Matematikarako konpetentziaren kasuan, ezin dira 2026ko emaitzak aurreko edizioekin alderatu, aurten ebaluazio-eredu berria erabili baita. Lehen aldiz, DBHko 4. mailako ikasleen ibilbideetara egokitutako bi proba egin dira: Matematika Akademikoak eta Matematika Aplikatuak.

Gainera, 2024arekin alderatu daitezkeen konpetentzia guztietan, DBHko 4. mailan sare publikoko emaitzek hobera egin dute eta sare publikoaren eta itunduaren arteko aldea murriztu egin da.

Ekitatean ere aurrerapenak

Eusko Jaurlaritzak nabarmendu du ekitatearen arloan ere “bilakaera positiboa” izan dela. ISEK indize sozioekonomiko eta kultural baxuena duten ikastetxeek izan dituzte hobekuntza esanguratsuenetako batzuk, bereziki DBHko 4. mailan.

Zientziarako konpetentzian, adibidez, ISEK baxuko ikastetxeek 10,2 puntu egin dute gora, eta ISEK ertain-baxukoek 10,7 puntu. Horren ondorioz, testuinguru sozioekonomiko hobea duten ikastetxeekiko aldea murriztu egin da.

Atzerritar jatorriko ikasleen emaitzek ere gora egin dute

Ebaluazioak atzerritar jatorriko ikasleen bilakaera ere jaso du. Bereziki bigarren belaunaldiko ikasleen emaitzak bertako ikasleen emaitzetara hurbiltzen ari dira.

Hobekuntza nabarmena izan da zenbait konpetentziatan. DBHko 4. mailako zientziarako konpetentzian, esaterako, bigarren belaunaldiko ikasleen emaitza 10,58 puntu igo da. Lehen Hezkuntzako 6. mailan, berriz, gaztelaniazko hizkuntza-komunikaziorako konpetentzian 10,61 puntuko hobekuntza izan dute.

Maila aurreratuetan ikasle gehiago

Errendimendu-mailak aztertuta ere badaude datu positiboak. Lehen Hezkuntzako 6. mailan gora egin du euskarazko, gaztelaniazko eta matematikako konpetentzietan maila aurreratuan dauden ikasleen ehunekoak. Zientzietan, berriz, behera egin du hasierako mailan dauden ikasleen proportzioak.

DBHko 4. mailan ere gora egin du errendimendu-maila altuenak lortzen dituzten ikasleen kopuruak. Euskarazko konpetentzian, aldi berean, maila aurreratuan eta hasierako mailan dauden ikasleen ehunekoak gora egin du; horrek emaitzen heterogeneotasun handiagoa erakusten du, eta datozen ebaluazioetan jarraipena egingo zaio.

Hala ere, ebaluazioak agerian uzten du oraindik badirela errendimenduaren hasierako mailetan dauden ikasleak eta emaitzetan desberdintasunak mantentzen direla, besteak beste, testuinguru sozioekonomikoarekin eta hezkuntza-ibilbidearekin lotuta.

Eusko Jaurlaritzaren arabera, 2026ko Ebaluazio Diagnostikoaren emaitzek hezkuntza-sistemaren bilakaera aztertzeko eta hurrengo urteetan indartu beharreko neurriak identifikatzeko informazio berria eskaintzen dute.