Maddi Murgiondok bere hiru ikaskideekin batera, HitzKeta proiektua abiatu zuen Haur Hezkuntzako gradua egiten ari zela. Orain, urte batzuk beranduago eta pandemiak ekarritako egoera tarteko, proiektuari beste buelta bat eman eta era berrituan aurkeztu dute.

Zer da HitzKeta?

Euskarazko abestien, olerkien eta liburuen bildumez osatutako webgunea da. Eta gainera, bilduma bakoitzarekin batera, horiek lantzeko proposamen didaktikoak eta beste zenbait lanketa ere jarri ditugu eskuragarri.

Proiektuaren izenak, HitzKetak, zer esan nahi du?

Interneten begira ari ginen eta keta atzizkiak bilduma edo bilkura esan nahi duela ikusi genuen, eta gure webgunea literatur eta musika bilduma bat da; hortaz, nolabait, hitzen bilduma bat.

Graduko ikasketak egiten ari zinetela otu zitzaizuen ideia…

Bai. Nire ikaskide Naroa Mendizabal, Haritz Mujika eta Miren Puertas ere badaude HitzKetaren atzean, eta Haur Hezkuntzako graduko 4. mailan geundela sortu zitzaigun ideia. Antzeko interesak partekatzen genituen ikaskideekin elkartzeko esan ziguten, eta ondoren, teknologia berriak baliatuz proiektu bat sortzeko.

Zein da zuek partekatzen duzuen interesa?

Batez ere irakaskuntza, baina horrez gain, euskarak eta euskal kulturaren inguruko interesak batzen gaitu. Horregatik erabaki genuen gai horri tiraka hastea. Gainera, orain arte egin gabe zegoen zerbait sortzea zen gure asmoa, eta hutsuneak eta beharrak aztertzeari ekin genion. Hala, jabetu ginen, eskoletan –eta batez ere haur txikiekin lan egiten dutenetan–, oso baliabide gutxi daudela euskara eta euskal kultura lantzeko. Argi ikusi genuen kalitatezko zerbait egin behar zela, batez ere, literaturak eta musikak garrantzia handia dutelako sasoi horretan.

Nondik eskuratzen duzue materiala?

Gradua egin bitartean ekarpenak eta materiala jasotzen joan gara, eta baita praktikaldietan ere. Gainera, gaiarekiko interes berezia dugunez, gure kabuz ere aritu gara. Dena den, iragazi egiten dugu dena, kalitatezkoa izan dadin. Euskal egile askoren lanak ditugu, eta baita euskarara itzultzeko proposamen batzuk ere.

Esan duzu materialaz gain, proposamen didaktikoak ere egin dituzuela…

Hala da. Bilduma bakoitzarentzat guk sortutako edota guri aholkatutako proposamenak bildu ditugu;  liburu, abesti edo olerkiekin egin daitezkeen jarduerak dira. Denak ez dira lanketak; bitxikeriak edo informazio gehigarria ere txertatu dugu.

Nolako harrera ari da izaten webgune berria?

Oso ona. Azaldu bezala, graduaren azken urtean sortu genuen proiektua, eta espero ez genuen erantzuna izan zuen. Eskoletara, inguruko irakasleengana eta sare sozialetara zabaldu genuen, eta harrera ikusita, aurrera egitea erabaki genuen. Halere, ondorengo bi urteetan, bakoitza bere kontuekin aritu da, eta apur bat utzi egin genuen HitzKeta, pandemia iritsi den arte. Itxialdian pentsatzen aritu ginen, eta egoera ikusita, gure webgunea oso erabilgarria zela iritzi genuen: eskolak itxita zeuden, irakasleek online bidaltzen zuten materiala… Horrela, webgune zaharra itxi eta berria sortu genuen. Egia esan, oso pozik gaude jasotzen ari garen erantzunekin.

Berrikuntzarik egin duzue webgunean?

Bai. Harpidetzeko aukera gehitu dugu. Hala, izena emanez gero, hilero buletina jasotzeko aukera egongo da, eta bertan, hilabetean zehar gehitutako edukia batuko dugu.

Pandemiari alde ona ateratzen jakin duzue…

Baietz esan daiteke. Orain guretzako garrantzitsuena jendearekin harremanetan egotea da. Erabiltzaileak proposamenak bidaltzera animatu nahi ditugu: gustuko duten abesti bat, olerkiren bat… Egia da proposamenen atalera gauza asko iritsi zaizkigula, eta apurka-apurka gehituko ditugu webgunera. Denon artean, denok erabiltzeko bilduma polita sortzea da asmoa.

Etiketak: