Aurpegitxo aldakorrak bezain dibertigarriak egitea proposatzen dizuegu gaur. Oraingoan ere irudimenak garrantzi handia du.

Materiala

  • Globo sendoak.
  • Irina
  • Ur botila.
  • Begitxo itsaskorrak.
  • Pintza bat.
  • Inbutu txiki bat.

Nola egin

  1. Bete botila. Inbutuaren laguntzarekin botilan sartu behar da irina. Poliki-poliki joan botila betetzen.
  2. Puztu globoa. Haizez puztu behar da globoa.
  3. Pintza jarri. Haizeak ihes ez egiteko jarri pintza globoaren puntan. Lagungarri izango zaigu hurrengo pausoa egiteko.
  4. Globoa kokatu botilaren puntan. Garrantzitsua da globoa ondo kokatzea. Urrats hau emango dugu botilan dagoen irina globoan erraz sartzeko.
  5. Bete globoa. Botila buruz behera jarri eta itxaron globoa irinez bete arte.
  6. Kendu haizea. Globoak gero forma ezberdinak hartzeko garrantzitsua da haizea ondo kentzea. Kentzerakoan egin korapiloa.
  7. Begiak jarri. Begitxoak ipini gustuko lekuan. Beste aukera bat da aurpegia –begiak, sudurra…– margotzea. Nahiago duzun moduan egin.
  8. Jolastu. Globoa prest dago aurpegi dibertigarriak egiteko. Estutu, luzatu, borobildu… globoa eta ikusiko duzu zenbat aurpegi agertzen diren.