Itxura eta eduki berrituak ditugu ‘Guraso.eus’ atarian

Etapa berria hasi dugu orain arte Guraso.com izena izan duen proiektuan. Aurrerantzean ere gurasotasuna eta euskara izango ditugu oinarri, baina txiki gelditu zaigu orain arteko plataforma eta aukera gehiago ematen dituen beste batera egin dugu salto.

Lehenengo aldaketa izenak dakar; Guraso.eus gara orain. Gainerako aldaketak atari digitalaren diseinuan eta aurkezpen-antolaketan egin ditugu. Orain, webgune garbiagoa, argiagoa eta dinamikoagoa dugulakoan gaude. Baliatu dugu aukera, baita ere, edukiak formatu eta aukera ezberdinetan eskaini ahal izateko. Hala, soinu eta irudi artxiboak ere aurkituko dituzue aurrerantzean Guraso.eus atarian. Handitzeko eta eduki zein formatu gehiago eskaintzeko bokazioarekin ekiten diogu etapa berriari.

Guraso.eus orain sei urte pasatxo sortu zuten Txatxilipurdi elkarteak eta Goiena Komunikazio Taldeak. Bidelagun garrantzitsuak izan ditugu, besteak beste, Arrasateko Udala, Eusko Jaurlaritza eta Gipuzkoako Foru Aldundia.

Kolaboratzaile talde sendoa eta gaurkotasuna

Bi balio erantsi ditu Guraso.eus atariak. Alde batetik kolaboratzaile talde sendoa, adituak eta arituak direnak. Nork bere esparruan hausnarketa lerro eta gai ezberdinak eskaintzen ditu.

Gurasotasunarekin lotutako gaurkotasuneko gaiei ere garrantzia handia ematen diegu. Jarraipena egin eta gure irakurleei eskaintzen jarraituko dugu.

Facebook eta Twitter bidez ere presentzia handiagoa lortu gura dugu.

Baliabide berriak

Atal berriei dagokienean nabarmendu nahiko genuke Jaiotze ostean eman beharreko urratsak jasotzen dituen gida. Berria da eta Euskal Autonomia Erkidegora mugatzen da, oraingoz. Asmoa da gida hori osatzen joatea eta berriak sortzea.

Gurasotasunak mila ertz ditu eta ume bakoitza eta familia bakoitza mundu bat da. Guraso.eus atarian ez dugu makilatxo magikorik, baina badugu aditu talde bat hainbat gairen inguruan euren hausnarketak plazaratzen dizkigutenak, euskaraz.