Bertsozale Elkarteko Hezkuntza Saileko materialgintza arduraduna da Ixiar Eizagirre, eta oraintsu atera dituzten karta sortak aurkeztu dizkigu.

Nolatan atera duzue karta joko bat?

Kartak umeekin bertsolaritza lantzeko pentsatuta daude; baina gure publikoari zuzenduta.  Testuinguruan jartzeko, Bertsozale Elkarteak hezkuntzan bi alorretan jarduten du. Alde batetik, 35 urte daramatzagu Euskal Herri osoko ikastetxeetan bertsolaritza lantzen. Proiektu handia da: 53 irakasle ditugu eskolaz eskola bertsolaritza erakusten, eta momentu honetan, 511 ikastetxerekin elkarlanean ari gara. Hots, 29.500 ikaslerekin ari gara lanean ikasturte honetan. Eta bestetik, bertso-eskolak ere badaude 111 herritan eta 1.300 haur dabiltza horietan…  

Hala, kartak elkarteko irakasleek sortutakoak dira, besteak beste, eskola eta saio horietan erabiltzeko.

Ez dira edozeinentzat orduan… Bertsozaleentzako dira zehazki…

Ez da edozeinentzako jolasa, ez. Eta jolasterakoan garrantzitsua da bertsotan dakien heldu bat aldamenean egotea; bestela haurrek, normala den bezala, ez lukete jakingo zer egin behar den edo zuzen dabiltzan. Esandakoa: batez ere, bertso-eskoletan erabiltzeko eta ikastetxeetako bertsolaritza saioetan erabiltzeko dira kartak.

Sei karta-sorta dira, ezta?

Hori da eta sorta bakoitzak  bat-batean bertsotan aritzeko aukera ematen du ariketa zehatz batekin. Ariketak oso ohikoak dira bertso-eskoletan, baina ikastetxeetan orain ari gara bat-batean jarduteko metodologia hau lantzen.

Zeintzuk dira kartek proposatzen dituzten jolasak edo ariketak?

Puntuari erantzuteko, oinak ematea;  azken puntua eta oinak ematea kopla ala bertsoa osatzeko; lau edo zortzi oinak emanda, puntutan ala bertsotan aritzea; errimatzen duten lau kartak lortzea eta horiekin ipuina asmatzea; hiru karta altxatu eta eta tokatzen den horretatik abiatzea; eta, bukatzeko, batek puntua abestu eta hitz ezkutua asmatzea.

Dagoeneko hasi zarete eskoletan erabiltzen?

Atera berri ditugu, baina bai. Gabonetako oporralditik bueltan prest genituen, eta orain gelaz gela ari gara erabiltzen; baita bertso-eskoletan ere. Egia esan, harrera oso ona izaten ari da

Nolakoa izan zen prestaketa-prozesua?

Bertsozale Elkarteko irakasleen lantaldea aritu da materiala sortzen, eta oso polita izan da Euskal Herriko zazpi lurraldeetako irakasle-taldeak elkartzea. Gainera, beraiek ziren materiala erabiliko zutenak eta hor zegoen garantia. Nolanahi ere, kartak probatu egin zituzten inprentara bidali aurretik. Oso jostagarria da, ludikoa, dibertigarria, eta irakasteko eta ikasterako orduan helduleku onak dira.

Beste edozeinentzat ere erabilgarri daude, ezta? Deskargatzeko aukera jarri duzue…

Hori da. PDF bertsioa igo dugu atarira, kartak deskargatu ahal izateko; deskargatu, inprimatu eta erabiltzeko moduan daude. Nolanahi ere, esan behar da aurre-salmentarako aukera ere zabaldu genuela inprimatzera bidali aurretik.

Gurasoek agian ez, baina txikiek karta hauek ezagutuko dituzte ziurrenik…

Bai, esan bezala, Euskal Herrian ia ikastetxe guztietan ari gara bertsolaritza proiektuarekin. Ziur irakurleen seme-alabak Lehen Hezkuntzako 4, 5 edo 6. mailan badaude, ezagutuko dituztela. Eta, jakina, bertso-eskolara badoaz, bertan ere izango dituzte. Materiala bertso-eskola guztietara iritsarazi dugu, bertan borondatezko lana egiten duten irakasleei lana asko erraztuko dielako jolasak.

Etiketak: