Herri eta hiriak haurrenak ere badirela aldarrikatzeko sortu zuen Txatxilipurdi elkarteak kalekantoi jolas bilduma. Bertatik ekarri dugu jolas proposamen hau. Kalekolore
Azalpena:
Jolasa hasteko ” baserritar itsua” nor izango den aukeratu behar da. Hau da, zotz egin ondoren begiak nori estaliko zaizkion erabakiko da. Ondoren, gainontzekoek jolaskide bakoitza zein abere izango den erabakiko dute (zakurra, katua, behia, untxia, oilarra, antzarra…) Itsua izango den lagunaren begiak zapi edo txapel batekin estali ondoren, honek besoak aurrealdera luzatuko ditu eta gainontzeko jolaskideek hatz banatatik helduko diote. Jolaskide guztiek hatz batetik helduta dutela itsuak abestiaren lehen zatia bi aldiz abestuko du: BASERRITAR ITSUAREN ETXEAN, BASERRITAR ITSUAREN ETXEAN… Animaliek, berriz, abestiaren bigarren zatiarekin erantzungo die: ANIMALIAK DANTZAN! Azkeneko silaba aipatzerakoan (TZAN) partaide guztiek hatzak askatuko dizkiote eta korrika alde egingo dute. Guztiak korrika abiatzen direnean itsuak hitz hauek oihukatuko ditu, ahalik eta azkarren: BAT, BI, HIRU, GELDI!. Azkeneko hitz hau esaterakoan (GELDI), korrika ari direnak dauden tokian gelditu behar dute.
Denak gelditu ondoren itsuak animalia jakin baten hotsa entzun nahi duela esango du. Adibidez: ENTZUN NAHl DUT ZAKURRAREN ZAUNKA. 0rduan “zakurrak” dagoen tokitik erantzun beharko du: ZAUNK-ZAUNK. Honek lagunduko dio itsuari animalia hau non dagoen sumatzen. Beraz, itsua hotsa entzun duen tokirantz joango da eta zakurra harrapatzen saiatuko da. Zakurra ezingo da mugitu, ezta gainerako jolaskideak ere. Harrapatzen duen laguna zakurra bada, hurrengo txandan berau izango da itsua. Bestela, animalia guztiak hasiko dira hotsak ateratzen (kukurruku, miau-miau, marru-marru…) eta iskanbila horretan baserritarrak zakurra aurkitzen jarraituko du.
Helburua:
Zentzumen ezberdinez ohartzea eta ikusmen urritasunarekiko enpatia garatzea, bai egoera hau lehen pertsonan bizituz eta baita beharrezko laguntza eskainiz.
Argazkietan: Bergarako Aranzadi ikastolako patioan jolastu genuen baserritar itxura. Ikastolatik irten eta patioan osatutako talde inprobisatuan.
Argazkiak:
- 1- BASERRITAR ITXUA
- 2- HATZETATIK HELDU
- 3- BASERRITAR ITXUAREN ETXEAN…
- 4- ANIMALI DANTZAN
- 5- AURKITU ZAITUT
kalekantoi Egunerokotasunean hainbat egoeretan jolasteko jolasak batzen dituen bilduma da . Jolasak norberaren edo lagun taldearen gustura eta imajinaziora moldatzeko sortuak izan dira. Baita, espazio ezberdinek ematen dizkiguten aukera eta materialetara ere.
Herri eta hiriak haurrenak ere badirela aldarrikatzeko sortu zuen Txatxilipurdi elkarteak. Horregatik bultzatu nahi izan dituzte haurrak kalea bere egitera eta berain kasa bertan jolastera, Kale kantoiren hartzaile natural eta jolasaren protagonista izanik. Era berean, jolasaren indar sozializatzailea eta hezitzailea azpimarratu eta jarduera ludiko eta talde jolasaren bitartez zenbait gaitasun lantzeko baliagarria den tresna ere sortu dute.
Nahiz eta jolasen bilduma hau haurrentzat zuzenduta egon, helduen esku hartzea ere bultzatu nahi dute. Honetarako, irizpide eta aholku sorta ere prestatu dugu batez ere erabilera hezkidetzailea sustatu nahian.
Hezkidetza zergatik? Hain ohikoak diren sailkapen sexistak ekidin eta neska zein mutil izan jolasteko aukera guztiak eskainiz, haurrek euren identitate eta gaitasun sozialak askatasunean eraikitzeko besteak beste.
Hemen aurkitu dezkazu kalekantoiko hezkidetza gida.
Liburuxka honek, guztira 41 jolas biltzen ditu, haurren egunerokotasunean oinarritutako 6 multzotan banatuak:
– Bidejolasean: etxetik eskolara bidean jolastekoak.
– Gora jaixak: herrietako jaiak dituzte iturri.
– Helduak poteoan ari dira: helduen poteo aspergarrietan umeek ere gozatu dezaten.
– Eta orain bazkaria: bazkari amaigabeetan jolastekoak.
– Bizi bete kalea!: kaleko izkina edo txoko ezberdinetara moldatutakoak.
– Amalurra ere gure lagun: naturak oparitzen dizkigun jolasak.
Iruzkinik ez "Jolas proposamena: Baserritar Itxua"