Aurten ere Arrasateko Txatxilipurdi Elkarteak Gabonak gerturatzen doazen heinean Jostailu truke Merkatua egitasmoa martxan jarriko du. Jostailu ezberdinak lortzeko aukera eskaini nahi die herritarrei, trukearen balioa sustatuz eta berrerabiltzeari garrantzia emanez.

Aste honetan hasiko da jostailuak biltzen, eskuorri honetan agertzen den ordu eta lekuetan. Egitasmo honen berri izateko Arantza Osoro Txatxilipurdi elkarteko kidearekin hitz egin dugu. Berrerabiltzea, trukea, eta kontsumo arduratsua sustatzeko egitasmo baliagarria delakoan ekarri dugu Guraso.eus era. Herri ezberdinetako egitasmoak ezagutu nahi genituzke… Zer egiten da zuen herrian? Badago jostailuak trukatzeko aukerarik?

Arrasateko truke merkatua

Nahi adina jostailu ekar daitezke eta guztiek balio berdina izango dute. Horien trukean, txartelak jasotzeko aukera egongo da; jostailu bakoitzeko txartel bat.

Txartelei dagokionez, parte hartzaile bakoitzak ekarritako lehen bi jostailuengatik koloretako bi txartel izango ditu eta hauek azoka egunean nahi duen orduan aldatu ahal izango ditu (11:30-13:30 bitartean). Gainontzeko jostailuengatik zuri-beltzeko txartelak jasoko ditu eta hauek azoka egunean bigarren orduan aldatu ahal izango ditu (12:30-13:30 bitartean). Hau da, parte hartzaile batek bost jostailu ekarriz gero, lehen bi jostailuengatik koloretako bi txartel eskuratuko ditu eta gainontzeko jostailuengatik, hiru txuri beltzeko txartel jasoko ditu.

Jostailuek bete beharreko baldintzak honakoak izango dira; osorik eta egoera onean egon beharko dira. Bestalde, ez ditugu onartuko indarkeria sustatzen duten jostailuak ez eta sexu bereizketa egiten dituztenak.

Azoka bera abenduaren 12an egingo dugu Biterin. Txartelen truke jostailuak trukatzeaz gain, elementu naturalez baliatuz, tailer bat eskainiko dugu.

Gaur egungo egoera kontuan izanik, egitasmoa moldatu eta segurtasun neurriak betetzen ahaleginduko gara uneoro. Jostailuak desinfektatuko ditugu azoka egunean garbi egon daitezen. Hau horrela izanik, azoka egunean, ez dugu jostailurik jasoko, hau da, aurrez txartelak dituztenak bakarrik izango dute aukera jostailuak jasotzeko.