Nire gorputzean bizi naiz eta Badauzkat nire zulotxoan… dira Kimu bildumako lehehengo bi liburuak. Ikaselkar hezkuntza argitaletxeak argitaratu ditu eta helburu bezala dute haurrek hitzarekin jolas egitea. Liburuak irakurtzen eta idazten ikasten ari diren bost urtetik aurrerako umeei  zuzendutakoak dira.

Juan Kruz Igerabide da Nire gorputzean bizi naiz liburuaren idazlea. Igerabidek Literaturaren  alor ugari jorratu ditu eta Haur eta Gazte Literaturan lan ugari argitaratu ditu. Kasu honetan, Ainara Azpiazuren marrazkiek laguntzen diote liburu berriari.

Nola jaso zenuen liburu hau egiteko proposamena?

Ikaselkar argitaletxeak proposamen bat egin zidan. Proiektu pedagogiko bat abiatu dute, eta literatur testuak erabili nahi izan dituzte. Hain zuzen ere, literatur lanak oinarri hartuta, testuen zein marrazkien irakurketaren bidez, Kimu bildumako liburuak ahozkotasuna  lantzeko tresna izatea nahi dute.

Lehen Hezkuntzako 1. mailako umeentzat poema batzuk aukeratzeko esan zidaten. Haiek proposamen batzuk bazituzten jada nire lan batzuetatik hartuta, eta nik gaia gorputza izatea proposatu nien. Han eta hor nituen poemak hartu nituen eta egokitu egin nituen garaira eta adinera; egungo ikuspegitik abiatuta eraberritu nituen. Horrez gain, berriren bat sortu dut, eta gorputzaren inguruko poema sorta osatu dut.

Zer bilatzen du liburuak?

Liburuak gorputzarekin jolasteko proposamena egiten du; hatzekin, sabelarekin, buruarekin, begiekin… Eta gorputzarekin jolasteaz gain, hitzekin ere jolastea da helburua.

Garrantzitsua da gorputza lantzea?

Helduekin ere bada, baina umeekin gorputza lantzeak berebiziko garrantzia du. Inportantzia handia du hitza, poesia eta ipuina gorputzarekin lotzeak; hurrek gorputzarekin identifikatzen baitute entzuten dutena. Gainera, tradizioak ere lan handia gin du gaiari lotuta; pieza asko egin dira, adibidez, hatzekin jolasteko, eta nik beste batzuk asmatu ditut. Tradizioarekin jarraitzeko gonbidapena da nolabait.

Eta, besteak beste, igarkizunak ere txertatu dituzu, ezta?

Bai, baina igarkizunak ere poesiaren bitartez egin ditut. Adibidez, ispiluari edo jantziei buruzkoak dira, baina denak pieza poetikoak dira.

Ainara Azpiazuk egin ditu marrazkiak. Nolakoak dira?

Berak hobeto azalduko luke, baina nik esango nuke xamurrak direla; xaloak. Haurrekin oso ondo konektatzen dute. Koloretsuak dira, mugimendua islatzen dute, baina aldi berean oso xumeak dira eta ume baten pentsaerarekin lotzeko oso aproposak.

Aste honetan aurkeztu duzue liburua. Jaso duzue iritzirik dagoeneko?

Beno, nik oraingoz ez dut inorekin hitz egin, baina interesa, antza, piztu du. Beste hizkuntza batzuetan ateratzeko proposamena jaso dugu; momentuz, gaztelaniaz eta katalanez bai behintzat.

Liburuaz harago, zer iruditzen zaizu Ikaselkarren proiektua?

Interesgarria da literatura eta irakurketa lantzen direnean  testu erakargarriekin egitea; testu jostariak erabiltzea. Proiektuaren alde garrantzitsua eta polita iruditzen zait.

Etiketak: