Debagoieneko zenbait gurasok osatzen dute Katearen Loturak elkartea buruko gaitzak eta drogadikzioak dituzten pertsonen senideen artean “indarrak batzen jarraitzeko”. Elkartearen aurkezpen ekitaldia iragarri dute urtarrilaren 30erako, Oñatiko Santa Ana aretoan.

2019ko irailean sortu zuten, formalki, Katearen Loturak irabazi asmorik gabeko elkartea “substantzia estupefazienteekin lotutako edo lotu gabeko trastorno edota patologia desberdinak dituztenen” zenbait senide eta lagunek. “Tamalez”, arrazoi ugarigatik eduki zuten erakundea martxan jartzeko determinazioa, Mariluz Casatorre idazkariak aipatu duenez: “Gure ingurukoek jasaten duten babesgabetasun egoerari amaiera eman nahi diogu, gizartea sentsibilizatuz eta administrazio publikoen arteko koordinazioan zubi-lanak eginez”.

Debagoienean adinez txikiak zein nagusiak diren gazte askok arreta psikologiko eta terapeutikoa behar dutela aldarrikatzen du Casatorrek: “1/2016 Legeak argi eta garbi dio atentzio integralerako eskubidea bermatuta daukatela adikzioak zein buruko patologiak dituztenek; guk lege hori betetzea eskatzen dugu, ez besterik”.

Errealitatean, ordea, oztopo “agorrezinak” izan dituzte arazo horiek pairatzen dituzten senideek. Udalek drogen gaineko prebentzioa “bakarrik” lantzen dutela diote, eta gaitza sortuta dagoenean “ezer gutxi” eskaintzen dietela. Azaltzen dute, bestalde, osasun zentro espezializatuek 18 urtez azpikoei baino ez dietela jarraipen osatua eskaintzen, legearen arabera adinez nagusikoen kasuan “norberaren borondatearen araberakoa” delako tratamendua jasotzea. Kontraesan handia ikusten dio horri Casatorrek: “Denok dakigu drogek norbanakoaren borondatea suntsitzen dutela”.

Bidelagunen beharra

Ezintasun horren jakitun, “indarrak batzearen aldeko apustua” egiten dihardute Katearen Loturak elkartekoek. Aurrerapausoak emateko profesional handien laguntza ezinbestekotzat jo du Casatorrek: “Familia-orientatzaileekin, kolektibo zaurgarriekin aritzen diren langileekin eta gazteen problematikak lantzen dituzten hezitzaileekin batu gara. Ekarpen ikaragarria egin digute, kontuan hartuta eskainitako laguntza guztia borondatezkoa izan dela”, nabarmendu du erakundeko idazkariak.

Gipuzkoako Batzar Orokorretan ere aurkeztu zuten euren burua kolektiboko kideek. Bertan zer-nolako harrera jaso zuten galdetuta, politikariak euren aldarrikapenekin “erabat ados” azaldu zirela baieztatu du Casatorrek. Hala ere, eskertuko lukete administrazioek “euren eskuetan dagoena” egingo balute: “Gizarte alorreko arduradun politikoek planto egin izan digute behin baino gehiagotan; harrigarria egiten zaigu gurean hamarkadatan errotuta egon den arazo honi irtenbiderik emateko gai ez direla ikustea”.

Jasotzen dituzten dirulaguntzak ere “interes falta horren” adierazgarri direla uste du: “Erakundeen aldetik laguntza ekonomiko urria jasotzen dugu, eta horrek zaildu egiten du gure erronkak gauzatu ahal izatea”.

Helburuak lortzeko lanean

Etorkizunean “estigma eta bazterketa soziala murriztu eta droga-mendekotasuna duten gazteei zerbitzu integrala” eskaintzeko asmoz, proiektu bat bideratu nahi du Katearen Loturak elkarteak, Bizkaian kolektibo zaurgarriekin lan egiten duen Erain kooperatibarekin elkarlanean. “Guretzat lorpen handia litzateke eraikin bat eskuratzea, faltan sumatzen ditugun beharrak asetzeko bertan. Profesionalek eta erabiltzaileek harreman estua garatu ahalko lukete horrela, eta familiok hainbeste sufritu ditugun arazoak ekidin ahalko lirateke”, dio Casatorrek.

Urtarrilaren 30eko aurkezpen ekitaldia

Elkartea sortu zutenetik bidean aurkitu dituzten “profesional eta pertsona apartek” gidatuko dute Oñatiko Udalarekin elkarlanean antolatutako aurkezpen ekitaldia. Hasteko, Gabriela Michel familia-orientatzaileak hartuko du hitza. Psikoterapeuta “lehen momentutik” egon da Katearen Loturak elkartearekin harremanetan; erakundearen helburuak azalduko ditu berak.

Ondoren izango da Raul Giralde eta Iñaki Garcia Gaztedi eta Erain elkarteko kideen txanda; euren lan esperientzia eta gaiarekiko ikuspuntua azalduko dute.

Azkenik, modu birtualean parte hartuko du Yo, madre de un adicto liburua idatzi duen Desiree Bujanda venezuelarrak.

Hitzaldia 18:30ean hasiko da, eta 132 pertsonarentzako tokia egongo da aretoan.

Iturria: Goiena.eus.