Drogekiko mendekotasunaren ondorioak mendekotasuna dutenek bakarrik ez, haien ingurukoek eta familiek ere jasaten dituzte. Gauzak horrela, senideei bideratutako laguntza programa bat jarri du abian Arrasateko Udalak.  

Programaren baitan, bi astean behin batuko den laguntza taldea ere sortu dute; hain zuzen ere, sostengu emozionala eta egoera zailak kudeatzeko tresnak emateko. Lan horietan ariko da Kemen Atxurra psikologoa.  

Familia bakoitzaren egoera desberdina izan daitekeen arren, eta orokortu ezin daitekeen arren, mendekotasun egoeran dagoen pertsona batek “oso egokiak ez diren jarrerak” izan ditzakeela dio Atxurrak, eta horrek  senideen sufrimendua eragin dezakeela: “Oro har, senitarteko bat bizi-kalitatea galtzen doala ikusteak sufrimendu handia eragiten du, mendekotasuna izan edo beste gaixotasun bat izan”.

Gainera, gehitu du familiako kidea errudun sentitzea ohikoa dela. “Erantzukizun edo erru puntu bat sentitzea naturala da, dolu prozesu baten baitan eman daitekeen gauza bat da”, azaldu du.  

Nola atzeman mendekotasuna?

Psikologoaren arabera, jarrera aldaketak eragiten ditu kontsumoak: “Lanera huts egitea, ohi baino diru gehiago gastatzea edota etxe inguruan lapurreta txikiak egotea izan daitezke zantzu batzuk, adibidez. Pertsona hori mendekotasun prozesu baten hasieran, egon daitekeela pentsa genezake”.

Hala, esan daiteke drogen kontsumoa mendekotasun bihurtu daitekeela egunerokotasuneko ekintzak egitea oztopatzen duenean. “Hor bilakatzen da mendekotasun, lagun edo familia harremanak eta baita diruaren kudeaketa bera ere oztopatzen hasten denean”, dio Atxurrak.

Nolanahi ere, gizartean “moral bikoitza” dugula dio psikologoak, eta droga batzuk “normaltasun osoz” kontsumitzen ditugula: “Ikastetxe batean emandako tailer batean, DBHko ikasleek alkohola ez zuten droga kontsideratzen. Legalak diren drogekin oso permisiboak gara, baina beste droga batzuk zigortu egiten ditugu”

Etiketak: