Eskola Kirola bai? Ez? Noiz? Nola?… Albiste ezberdinak jaso ditugu eta aldundi bakoitzetik mezu ezberdinak iritsi zaizkigu azken hilabetean. Martxan jartzeko da datozen asteetan lurralde guztietan baina baldintza oso zehatzekin. Kontaktu fisikorik ez egotea umeen artean. Hau da, une oro segurtasun distantzia errespetatzea. Nola egiten da hau baina?

Beste aldundiek egin duten bezala, Gipuzkoako Foru Aldundiak Eskola Kiroleko jarduerei eusteko proposatu die ikastetxeei, kirol eragileei eta gurasoei. Hau egin ahal izateko baina hezitzaileei tresnak ematea ezinbestekoa iruditu zitzaien eta kontakturik gabeko Eskola Kirola izeneko baliabide sorta argitaratu dute.

12 saioz osaturiko unitate didaktiko bat da, Eskola Kirolean erabiltzeko helburua duena, kontakturik gabe eta1,5m-ko distantzia mantenduz jarduteko jolasez, dinamikaz eta orientabidez osatua. Bertan, aldaera anitz proposatzen dira eta begirale bakoitzak bere saioak prestatzeko proposamenak aurki ditzake. Era berean, adimen emozionala garatzeko proposamenak integratu dira saioetan zehar.

Unitate didaktiko honetaz hitz egiteko Unai Asurmendi Gipuzkoako Foru Aldundiko kirol planifikazio teknikariarekin hitz egin dugu.