Hezten elkarteak Korapilatu izeneko karta-jolasa sortu du, Euskal Herrian sortu, diseinatu eta ekoitzia. Hitz, irudi eta hizkiak lotu eta pilatu! leloa du jolasak. Guk Korapilatu aurkeztu eta Hezten elkartearen berri izateko Ainhoa Pinedorekin hitz egin dugu.

Korapilatu Karta-jolas honetan, hizkiak, hitzak eta irudiak topatuko dituzue. Karta guztiek irudiak dituzte alde batean eta, bestean, hitzak eta hizkiak. Jolaserako aukera mordoa duzu. Helburua, hitzen eta irudien arteko lotura egitea izango da (hitz-hitz, irudi-irudi edo irudi-hitz). Hitzek eta, batez ere, irudiek bakoitzari iradokitzen diotena askotarikoa izan daiteke, beraz, milaka dira sortu daitezkeen loturak!

Jolasaren sortzaileek 3 jolas proposatuko dituzte (kaxan azalduta daude) eta, hortik aurrera… jolas berriak sortzera ere animatzen gaituzte!

KORAPILATU Hezten-eko kideen artean sortua izan da eta diseinu lanetarako Irrimarra ilustratzailearen eta Sorland agentziaren laguntza izan dute.