Josu Bergara aretxabaletarrak haurrei eta familiei zuzendutako Loa eta Laia euskarazko musika proiektua sortu du. Ingurune digitalean bideratzen da eta euskal kultura, ohiturak eta gizarte hobeago baten aldeko balore unibertsalak sustatzea du helburu. Dagoeneko lehen atala ikusgai dago, sortu duten webgunean.

Marrazki bizidun digitalak dira Loa eta Laia bi protagonistak, eta haien inguruan sortu den unibertsoarekin batera, musikaren bidez gai eta balore ezberdinak landuko dituzte. Ingurune digitalean jaio eta bizi dira biak, webgune eta YouTubeko kanal propioekin.

Horrela, euskal kultura eta gizartearekin lotutako egun handiak edota ohiturekin erlazionatutako ekintzak hartzen dituzte; hala nola, Gau Beltza edo Euskararen Eguna.

Landutako gai bakoitzak abesti bat eta aparteko ekintza osagarri bat proposatuko ditu. Adibidez, musikarekin lotutako gaiak ezagutaraztea; euskarazko hitzen hiztegia lantzea… Modu transbertsalean Garapen Jasangarrirako helburuak landuko dira baita ere.