Haurrendako euskarazko lehen plataforma digitala da Makusi eta mugikor, tablet, webgune edota telebistan ikus daitezke hango edukiak. EITBk sortu du eta adierazi dute etxeko txikienek “modu seguruan” biziko dutela online esperientzia: “Makusik gure hizkuntzan eta kulturan murgiltzeko aukera eskaintzen die haur eta gazteei, edukien eskaintzarik onenarekin eta teknologiarik puntakoena erabilita, gailu eta ingurune guztietatik sartu ahal izateko”.

Makusi doako plataforma digitala da eta haur nahiz gaztetxoendako askotariko ikus-entzunezkoak eskaintzen ditu: marrazki bizidunen eta telesailen 100 izenburu baino gehiago; 5.800 atal; 120 pelikula… Denera 1.700 ordutik gora ikusgai. Edukiak adinaren arabera sailkatuta daude eta bakoitzak sustatzen dituen balioen deskribapen fitxa ere erakusten du.

Hiru saio propio

Plataforma berriarekin batera hiru saio propio estreinatu ditu Makusik: Potx eta Lotx, txikienendago pailazoen programa; Kalaxka, Aritz Mendiolak eta @anepe.acedo-k aurkeztutako gaztetxoendako aktualitateko magazina, eta Power up, euskaraz sortutako fikzioa, bideo-jokoaren mundua oinarri hartuta, nerabeen eguneroko gaiak eta arazoak jorratuko dituena.

Edukiak ikusteko erregistratu egin behar da, eta ohi bezala, plataforma berri hau gailunagusienetan dugu eskuragarri: webgunean, mugikor eta tablet-etan (aplikazioa Google Playn eta App Storen bitartez jaitsita); EITBko hbbTV zerbitzuan (botoi gorria). Laster Smart TV telebistetan ere ikusgai egongo da (Samsung eta LG marketan) eta chromecast gailuan edo norberaren Android gailutik TVra cast egiten.