“Denona eta denontzat izango den Euskal Herria eraikitzeko bidean, behar bati erantzutera dator Bizipoza Eskola: hezkuntza inklusiboa”. Hala adierazi dute bultzatzaileek asteon egindako lehen aurkezpenean. “Hezkuntzaren eta Bizipoza elkartearen arteko harremana aspalditik dator eta ekarpen praktiko bezain garrantzitsu eta beharrezkoa egitera dator Bizipoza Eskola”.

Abenduaren 15ean aurkeztu da egitasmoa Elgoibarko Danobatgroup-en egoitzan. Izan ere, Danobatgroupek gizarte erantzukizunarekin lotutako proiektuak bultzatzeko duen Elkarrekin Eragin programari esker finantzatu da proiektu guztia. Bertan parte hartu dute Leire Elizegi Beloki Bizipozako koordinatzaileak, Jose Antonio Hidalgo Danobatgroup-eko lehendakariordeak, Nerea Godoy Fuentes Bizipoza Eskolako koordinatzaileak eta proiektuaren proba pilotuetan parte hartu duten Amassorrain ikastola eta Aratz ikastola ikastetxeek eta Hilargi, Arnasa eta Ndank Ndank elkarteetako kideek.

Enpresa ongile askoren babesa

Bizipoza elkarteak azken urteetan Euskal Herriko kooperatiba eta enpresa ezberdinek egunerokoan egindako ekarpena eta babesletza ekonomikoa eskertzeko baliatu du agerraldia. Enpresa asko izan dira 2017az geroztik Bizipoza elkartearen proiektu ezberdinetan inbertsio ekonomikoak egin dituztenak, horien artean, Irizar, Orona, Kutxa Fundazioa, Fagor, Maier, Talleres Mitxelena, Laboral Kutxa, Mondragon Lingua S. Coop, BBK Fundazioa, Caixabank eta LagunAro, besteak beste. Guztira 1.400.000 euro inguruko inbertsioa egin dute guztien artean, Bizipoza proiektuaren % 85a.

Eta eskertza berezia egin zaio Danobatgroup-i, % 85eko ekarpen horretatik % 33ko ekarpena beraien eskutik etorri baita. Azken urteetan hainbat proiektu sortu eta finantzatu dira eurei esker eta baita gaur aurkeztutako Bizipoza Eskola ere. “Proiektu hau garatzeko 3 urtetako lana babestu duzue eta, beraz, uste dugu toki egokiena dela gaur aurkezpen hau egiteko”, adierazi du Leire Elizegi Belokik.

Gida didaktiko berriak

Hezkuntza arautuan, ez-arautuan zein herrigintzan erabili ahal izateko gida didaktikoak bildu dira bizipozaeskola.eus webgunean. Adin eta maila guztietara irekia, koloretako betaurrekoak jantzi eta norbera eta norbere ingurua zipriztintzeko gonbidapena egin dute Bizipoza elkartetik.

“Elkarteak sortzen diren arrazoi berdinagatik sortu da Bizipoza Eskola. Behar bat dago. Badaude haur eta familien eskubide batzuk bete gabe daudenak eta horren aurrean familiak edo norbanakoak elkartu egiten dira horri aurre egiteko. Guk gauza bera egin dugu. Gai ezberdinetan aritu eta adituak bildu ditugu eta gida hauek sortu ditugu elkarrekin, Bizipozaren baloreekin zipriztintzeko norbera eta bere ingurukoak”, azaldu du Nerea Godoy Fuentesek. “Webgunean hainbat material bildu dira: gida didaktikoak, material osagarriak eta egutegia. Horiei esker, gai ezberdinak landu ahal izango ditugu: Norbere buruaren ezagutza eta taldekidetasuna; genero rolak, identitatea eta transexualitatea; familia aniztasuna eta sexu orientazioa; heriotza; kulturaniztasuna; aniztasun funtzionala; gaixotasunak; eta boluntariotza…”

Gai horiek guztiek hezkuntza arautuko hainbat mailatara bideratu dira: HH, gela egonkorra, LH, DBH eta goi mailako hezkuntza. Hezkuntza ez-arautuan, berriz, hizkuntza-mailaren arabera sailkatu dira gida didaktikoak. Maila guztietarako gai berdinak proposatu dira baina hizkuntza-maila bakoitzera egokitzen da jarduera oro.

“Gure proposamena irekia da norberak bere testuingurura egokitu dezan. Jarduerak egokitzen dira Nafarroako eskola txiki batera nahiz Bilbo erdiguneko ikastola handi batera”, azaldu dute. Izan ere, Euskal Herriko lurralde guztietan 8 ikastetxerekin eta Leioako EHUko magisteritza eskolarekin proba pilotuak burutu dira. Horretaz gain, herrietan, aisialdi talde, euskaltegi eta beste hainbat eremutan ere bai.

Herrigintza atalari dagokionez, Euskal Herriko herri eta auzoetan Bizipoza dinamikak sortzeko baliabideak aurki daitezke. Adibide gisa, Lasarte-Oria herrian eta Bilboko Uribarri auzoan garatutako adibideak aurki ditzakegu webgunean.

Material osagarria

Hona hemen webgunean aurki daitekeen material osagarria:

  • Elkarteen komikiak.
  • Zenbait elkarteren marrazki bizidunak.
  • Elkarte bakoitzaren 3-4 minutuko mikro-dokumentalak.
  • Bizipozaren 20 minutuko dokumentala.
  • Elkarte bakoitzaren abestia, bideoklipa eta bi karaoke (ahotsarekin eta ahotsik gabe).
  • Elkarte bakoitzaren kantuaren partitura.
  • Elkarte bakoitzaren ilustrazioa.
  • Elkarte bakoitzaren nazioarteko eguna eta elkartearen manifestua.
  • ELKARBANATZEN atala: Bizipoza Eskolarekin bat egin duten ikastetxe, herri, aisialdi talde zein euskaltegiren esperientziak aurki daitezke, besteak beste, eta aurrerantzean garatuko diren esperientziak partekatzea helburu duen atala da.
  • ELKARTEAK atala: Elkarte bakoitzaren material osagarri guztia, elkarte horri lotutako jarduera guztiak eta elkarteak eskaintzen dituen zerbitzuak aurki daitezkeen atala.

Gida didaktiko eta material sorta handi honen aurrean, Bizipoza Eskola webguneak filtro bidezko bilaketa egiteko aukera dakar, erabiltzaileari bere testuinguruarekin bat doan jarduera aurkitzea errazteko asmoz.

Egutegia

Egutegiak elkarteen nazioarteko egunak jasotzen ditu, Eñaut Aiartzaguena Bravoren ilustrazioak eta Amets Arzallus hausnarketarako esaldiak. Adibidez, abenduarekin batera honako esaldia aurkituko dugu: “Euskara da gure azalaren kolorea”.

Aurkezpenak lurraldeka

Bizipoza Eskolak Euskal Herri osoa zipriztindu dezan, datozen hilabeteetan aurkezpenak egingo dira lurraldez lurralde.

  • Urtarrilak 31: Baiona.
  • Otsailak 7: Gasteiz.
  • Otsailak 21: Bilbo.
  • Martxoak 13: Iruñea.
  • Martxoak 27: Donostia.