Nahia Alkorta Elezgarairekin hitz egin dugu. Sabeletik Mundura egitasmoaren atzean aurkitu izan dugu, biolentzia obstetrikoaren gaia berarekin hasi gine lantzen eta egitasmo honetan egin duen kolaborazio bakoitzak eskini digu aitzakia gai baten inguruan hausnartzeko. Gaurkoan ama sareen garrantzian hitz egin dugu berarekin bere azken kolaborazioa aitzakia moduan erabilita.

Argazkia: Dani Blanco / ARGIA CC BY SA

11 urte dira lehen erditze osteko zuloan argi izpiak somatzen hasi nintzenetik; indarkeria obstetrikoak utzitako zauri sakonak nireak soilik ez zirela ikusi eta nire azpian sareak sentitu nituenetik; bizitza salbatu zidaten sareek heldu nindutenetik. 

Bakardadea, beldurra, mesfidantza eta min sakona sentitzen nuen unean iritsi zen nigana El Parto Es Nuestroren hazia izan zen Apoyocesareas posta zerrenda. Emakumeak euren esperientziak partekatzen eta elkar babesten eta sareak sortzen ari ziren espazio birtuala. Egun batzuez isilik besteak irakurtzen egon ostean egin nuen lehen kukua eta berehala heldu ziren maitasun eta aitortza mezuak. Nire sentimendu ia guztiak ulertuak ziren espazioa zen, baldintzarik gabeko espazio segurua. Eskerrak! Han sentitu nuen lehen aldiz, akaso ez nengoela zoroa… 

Ordutik, ama sareetan kulunkan jarraitzen dut apur bat zulorantz sentitzen dudanean nire burua eta argirantz begira nagoenean, aldiz, ama sareen ertz bateko hari muturra gogor tenkatzen saiatzen naiz behar duen oro kulunka dadin. 

Ziurrenik gure amonek sare antzekoa sentitzen zuen auzoko emakumeekin etxe atarian eserita ordu luzez aritzen zirenean… eta gure birramamek ahizpa, izeba eta amarekin baserrietan artoa aletzen kantuan igarotzen zituzten orduetan… Eta orain? Kapitalismoak apurtu nahi dizkigu sareak. Autoerrealizazioz mozorroturiko prekarietateak garamatza lana eta zaintzaren oreka ezinezkoetan dantza egitera oinak su gainean eta haurrak besoetan ditugun bitartean. Ez gara fio bizilagunaz, ez gara lagunei laguntza eskatzeko gai ahul garela usteko dutelakoan eta ezinezkoa da atarian eseritzea albokoa noiz etorriko zain…

Inoiz baina bakardade handiagoan hezi behar ditugu seme-alabak eta geure buruak berreraiki. Loari orduak lapurtzen dizkiogu garbigailua eseki edo kaka lasai egin ahal izateko… Zalantza txiki eta handiek itotzen gaituzte; eta gutariko askok geure haurrak izan arte ez dugu inoiz jaio berririk eskutan hartu. Nola egongo gara amak ongi?

Dena egitera derrigortzen gaitu sistemak eta egiten duguna egiten dugula ere epaituko gaitu albokoak eta jendarte osoak. Haur askeak, emozionalki inteligenteak, ongi elikatuak, natura maite dutenak, pantailen gaindi kirola maiteko dutenak eta ahal bada, etxekolanetan ariko direnak (instagramerako argazkietan ateratzeko baina gehiagotan, alegia) izan nahi ditugu. Feministak, ekologistak, komunikazio ez bortitzean adituak eta zoriontsuak. 

Harrapazan! 

Guk geuk ere sinesten ez dugun ko-gurasotasuna lortzen saiatuko gara bikotekidea daukagunok ardurak 50-50 banatuz eta gainera larrua jotzeko denbora aterako dugu. 

Eta puzzle perfektu horretan zerbait hankamotz geratzen bazaigu… hortxe errua zain. Bakardadeaz gain amatasunak zerbait badu autoexigentzia baita. 

Badakizu zer? Ezinezkoa da. 

Ezinezkoa da askotan etxetik arropa garbiarekin denok ateratzea; ongi orraztuta eskolara iristea gynkana izan daiteke eta ez da ezer gertatzen! Gora ile nahasiak eta irribarre askeak!

Gaur egizu ahal duzuna, eta bihar beste egun bat izango da (zorte handia baduzu, ez da haurrik gaixotuko). 

Bitartean, kulunkatu. Bilatu tinko helduko zaituen amen sarea eta kulunkatu bertan behar bestetan. Hemen ez dago ilaran itxaron beharrik edo hurrengoari txanda emateko zabua libre uzteko derrigortasunik. Guztiok batera kulunka gaitezke, edo guztiek batera sarea heldu… akaso, noizbait itzuliko baitira auzoetako emakumeen arratsalde pasak… bitartean eskerrik asko ama sareak sortu eta sostengatzen dituzuen ama indartsu eta ahul guztioi; lisatutako alkandora eta kamiseta zikina duzuen denoi. 

Biba internet eta ama sare birtual guztiak.

Oh: sare bila bazabiltza Telegramen Ama Sarea taldea sortu dute bi ama zoragarrik.