8. urtez jarraian antolatu dute Txatxilipurdi elkarteak eta herriko eragile ezberdinak Naturan Jolasean ekimena. Aurtengo edizioan ere  berrikuntzak aurkeztu dituzte.

Azken hamarkadetako gizarte zein bizi ereduak espazio naturaletatik urrundu eta hormigoizko hiri  handietara bizitzera eraman gaitu. Honek, naturak eguneroko bizimoduan aurrera egiteko  eskaintzen dizkigun baliabideei muzin egitea ekarri du.  

Naturatik urruntzeak,  kultura oso baten galera suposatzen du: jakituria, ohitura, erritu, legenda eta kontakizun herrikoiak; zuhaitz, landare eta animalien ingurukoak; landa eremuaren, urtaroen eta, oro har, lurraren ingurukoak; osasuntsu bizitzen laguntzen zigutenak eta, batez ere, gure bizitzari benetako zentzua ematen ziotenak.

Aldi berean argi dugu, natura ordezkorik ez duen osasun, ongizate, ikasketa eta sormen iturri agorrezina dela eta hau horrela, beharrezko ikusten dugu natur guneekiko atxikimendua areagotzeko dinamikak sortzea.

Zentzu horretan, Leintz Eskola Kirola, Besaide Mendi Elkartea, Gaztetxeko Guraso eta Haur Asanblada, Udalako Ingurumen Eskola, Guraso.eus, Naturtzaindia eta Txatxilipurdik elkarlanean antolatu dugu egun hau.

Jarraian aurtengo proposamenaren nondik norakoak:

                MAIATZAK 18 (osteguna):

18:00etan ADI NATURA LIBURU BILDUMAREN AURKEZPENA – Sua argitaletxearen eskutik. Ondoren ipuin kontaketa eta liburuko edukia praktikara ekartzeko tartea egongo da.

Monterronen (euriarekin, Kulturateko Loramendi gelan).

                MAIATZAK 20 (larunbata):

10:00etan/12:00etan ESPEOLOLOGIA TXANGOA – Montxongo kobaren barna, LH 3/4ko haurrei zuzendua eta bi txandatan banatua.

* Izen ematea ikastetxeetako LEK-eko koordinatzaileen bidez egin beharko da.

18:30ean ZIORLAKO BEGIRATOKIRA IGOERA – Biteri plazatik abiatuta.

19:30ean VIVAK AUZOLANA – Ziorlako begiratokian.

20:30ean AFARIA – Zeuk ekarri eta bertan jan.

21:30ean SAGUZARREN BILA – Naturtzaindiaren eskutik.

22:30ean IZAR BEHAKETA + VIVAK GAUA – Ziorlako begiratokian.

MAIATZAK 21 (igandea):

08:30ean HERRI GOSARIA

09:30ean JAITSIERA

10:30ean TALDE ARGAZKIA – Ziorlako astoan.

* Goian aipaturiko hainbat ekintzetan (Ziorlara igoera, Saguzarren bila, Izar behaketa, Vivak gaua eta herri gosaria) izena ematea beharrezkoa izango da.

Eman izena hemen

* Euria egingo balu, egitaraua Garagartzara bideratuko genuke, gaua Patxixena auzoetxean igaroz.

Animatu gurekin batera, NATURAN JOLASTERA!