Jolasa da haurrek ikasteko duten tresna nagusietako bat. Jolastean mundua esploratzen dute, esperimentatzen dute, asmatzen dute eta erratzen dira. Jostailu komertzialek eskaintzen dituzten aukera mugatuek ez bezala, naturak bere esku jartzen ditu testura, ñabardura eta aukera desberdinak dituzten objektu ugari, irudimena esperimentatu eta garatzeko aukera ematen dietenak: harriak, makilak, hostoak, intsektuak, ura, haziak… Baliabide horiek erabili ditzakegu mendira, basora edo naturguneetara egiten ditugun irteerak jolas erakargarri bihurtzeko, haurrak protagonista izango diren abenturak proposatzeko. Jarraian, naturan jolasteko ideia batzuk uzten dizkizuegu, haurrekin txangoak egitean erabiltzeko baliagarriak. Baina aukerak infinituak dira, naturan eta naturarekin jolasteko zure proposamena gustora irakurriko genuke.

Satorraren jolasa

Jolas dibertigarri honetan aritzeko bi talde osatu beharko ditugu. Bakoitzak naturan dauden 5 elementu bilatu beharko ditu (adarrak, haziak, harriak, lumak…). Objektu guztiak bildu ondoren, beste taldeko pertsona bati begiak estaliko zaizkio, eta ukimenaren eta usaimenaren bidez (dastamena erabiltzeko aukera zuen esku) asmatu beharko du zer den. Benetako sator itxuak bagina bezala!

Zuhaitz lasterketa

Lehen begiratuan, zuhaitz guztiek elkarren oso antzekoak dirudite. Jolas honi esker, haurrek toki bateko landare eta zuhaitzen izenak eta desberdintasunak ezagutzen ikasiko dute. Heldu batek hurbileko zuhaitz baten izena ozenki esango du, bide ondoan dagoena, eta haurrek zuhaitz hori bilatu eta ukitu beharko dute. Pisten bidez ere egin daiteke, hostoen edo fruituen ezaugarri bat nabarmenduz.

Tarteko arrama

Jolas honetarako tamaina desberdineko bi harri edo bi adar hartu beharko ditugu. Haurrei erakutsiko dizkiegu, eta ikusi dituzten bi objektuen tarteko tamaina duten harriak edo adarrak ekartzeko eskatuko diegu. Neurri egokiko objektu gehiago biltzea lortzen duenak irabaziko du jolasa.

Esploratzaileak

Basoan altxor ugari aurkituko ditu begiak irekita dituenak, hain zuzen ere, jolas honi esker, modu dibertigarri eta atseginean garatu ahal izango dugu haurren begirada. Horretarako, gure inguruan aurki ditzakegun 5 elementu batuko ditugu eta esploratzaile txikiei erakutsiko dizkiegu. Bidea utzi gabe 5 objektu horiek biltzea lortzen duenak irabaziko du jolasa. Kolore bereko 5 objektu jasotzera ere jolastu daiteke.

Zuhaitz galduaren bila

Natura zentsumenak aberasteko mundua da: usainak, paisaiak, zaporeak, soinuak, testurak… . Jolas honen bidez, haurrek basoa beste modu batean ezagutuko dute, zentzumenak ahalik eta gehien indartuz. Begiak estalita, haurrak zuhaitz jakin batera eramango ditugu. Bi minutu emango dizkiegu ukimenarekin eta usaimenarekin, zuhaizta esploratu ahal izateko. Oraindik begiak itxita, abiapuntura itzuliko gara berriro, eta bereien zuhaitza zein den jakiteko eskatuko diegu, orain begiak irekita. Ea aurkitzeko gai diren!