AktualitateaGurasotasuna

Nerea Mendizabal: “Emozio-koktel handia bizi dugu egunotan, eta hori arnastu egiten da etxeko giroan”

2020-04-12 Iruzkin 1

Hernaniko Udaleko haur eta gazteria sailak antolatuta Haurrak eta konfinamendua izenburupeko tailerra egin zuen Nerea Mendizabal psikopedagogoak apirilaren 8an. Telematikoki egin zuten saioa eta konfinamendu egoerak haurrei nola eragiten dien izan zuten aztergai. Egoera kudeatzeko zenbait orientabide ere eman zituen Mendizabalek.

“Uneotan ezin dugu emozioetatik ihes egin eta pil pilean dauzkagu”, esan zuen. “Krisialdia estresante batean gaude eta kezka handiak ditugu: haurrak, nagusiak, lana, etorkizuna… Gainera, estres hori askatzeko orain arte genituen moduak –kirola, irteerak…– mugatu egin zaizkigu eta bide berriak asmatu beharrean gaude”.

Emozioen kudeaketa zaintzeak berebiziko garrantzisa duela azpimarratzen du Mendizabalek. “Emozio-koktel handia bizi dugu egunotan, eta hori arnastu egiten da etxeko giroan. Haurrek esaten duguna baino gehiago jasotzen dute esaten ez duguna, eta hori gure seme-alaben jokaeretan ere isladatu daiteke. Kontuan hartu haurrei ere egoera izugarri aldatu zaiela, eta horrek esan nahi du emozioetan ere eragingo duela”.

Deserosoak egiten zaizkigun emozio adierazpenak isilarazi nahi izaten ditugula dio adituak, bai gureak bai seme-alabenak. “Proposatzen dut kendu edo isilarazi baino sentitzea emozio horiek; izan ere, emozio horiek hobetu behar ditugun gauzei buruz mezu bat edo informazio bat ematera datoz. Hala, sentitzearekin markatuko zait egin dezakedan bidea”.

Youtube grabatuta gelditu den saioan hainbat gomendio ematen ditu Nerea Mendizabalek. Horien artean daude, esaterako, estresa deskargatzeko ekintza antolatzea, bai familian bai norbanakoarentzat. “Salto, borroka gerrak, gorputz mugimendua, adierazpenerako kanal desberdinak (marrazkiak, plastilinak, abestiak…)”. Gurasoek ere beraien buruz zaintzea garrantzitsua dela dio: “Gurasook ere gure burua zaintzea garrantzitsua da umeen zaintzarako”.

Pantailen erabilera, irakasleen edo ikastetxeen papera itxialdi honetan… askotariko gaiak jorratzen dituzte saioan. Jarraian duzue osorik ikusgai.

Bideoa osorik hemen ikusgai.



Iruzkin 1 "Nerea Mendizabal: “Emozio-koktel handia bizi dugu egunotan, eta hori arnastu egiten da etxeko giroan”"

  1. Avatar
    Arantza
    2020-04-13 Erantzun

    Ezin da bideoa ikusi


Zure iritzia partekatu nahi duzu?

Zure eposta ez da argitaratuko. Derrigorrezko eremuak * bidez markatuta daude.

Utzi erantzuna