Euskadiko Orkestra Sinfonikoaren Musika Gelak Musika Familian kontzertuak aurkeztu ditu. Haurrek familiekin gozatzeko kultur aisialdiko eskaintza da, et aurten hiru produkzio propio estreinatuko dituzte Gasteizen: Maitasun epikoak, Mozart, Nannerl eta lagunak eta Ekomusik.

Euskadiko Orkestra Sinfonikoak haurrei eta gazteei eskaintzen dizkien jardueren artean ibilbide luzeena eta finkatuena du Musika Familian egitasmoak; izan ere, 22 urte daramatza martxan.

Aurten hiru produkzio propio estreinatuko ditu Euskadiko Orkestra Sinfonikoak ziklo horren baitan, eta askotariko adin-taldeei zuzendutakoak dira; 2 urtetik hasi eta 16 urteraino.

. Maitasun epikoak. Otsailaren 28an izango da, 19:00etan, Principal antzokian. Orkestra osoarekin egingo den emanaldia da. Bidaia bat da Europako iparraldera. Musikaren bidez penintsula eskandinaviarraren paisaia naturalak eta kultura ezagutzeko aukera emango du. 10 eta 16 urte bitarteko gazteei zuzendutako kontzertua da.

. Mozart, Nannerl eta lagunak. Martxoaren 1ean izango da emanaldia Garcia Lorca antzokian, 17:00etan. 2-5 urte bitarteko haurrei zuzendua da. Wolfgang Amadeus Mozart konpositore ezaguna eta bere arreba Maria Anna ‘Nannerl’ dira protagonistak.

. Ekomusik. Maiatzaren 17rako iragarri dute, 18:00etan, Principal antzokian. Musika tresnak era artisauan nola eraikitzen diren eta musikaren esentzia naturan bila daitekeela erakusten du obrak. 6-10 urte bitarteko neska-mutikoei zuzenduta dago.

Ikuskizun guztiak Gasteizko Udalaren antzoki-sarearekin koprodukzioan prestatu dira. Sarreren prezioa 6 euro da eta urtarrilaren 30etik aurrera egongo dira salgai euskadikoorkestra.eus eta principalantzokia.org webguneetan. Baita ere 945 16 10 45 telefono zenbakian zein Principal antzokiko leihatilan.

Sentsibilizazio tailerrak ere bai

Maitasun epikoak eta Ekomusik ikuskizunek, bestetik, sentsibilizazio tailer bereziak izango dituzte aurretik, 17:45ean eta 16:45ean, hurrenez hurren. Tailer horiek doakoak izango dira kontzerturako sarrera dutenentzat, baina aldez aurretik eman beharko da izena 945 16 10 45 telefono zenbakian. 30 lagunentzako lekua dago.

Informazio gehiago hemen.