Ederra da Biarritz eta familia giroan egiteko moduko 5,48 kilometroko txangoa proposatzera gatoz. Pare bat ordu eskasean egiteko moduko joan-etorria da, eta erraza neska-mutikoekin egiteko. Hori, kontuan hartu gabe bidean egin daitezkeen etenaldiak bistaz gozatzeko edota jardinetan atseden hartzeko.

Ibilbide ia osoan izango dugu itsasoa begien aurrean. Angelun dagoen Amodio ganberako hondartzatik abiatuko gara. Aparkaleku asko dago. Gomendatzen dizuegu Iturburuen Pasealekuaren –Promenade des Sources– amaieraraino autoz joatea. Bidea gorantz hasten denean itxita dago zirkulaziora. Aukera baduzue inguru horretan utzi autoa. Ibilbidearen jomuga den Biarritzeko itsasargia erraz ikusten da bertatik.

Gorantz egingo dugu hasieran eta halako batean bat egingo dugu Itsasoaren Bulevarrarekin –Boulevard de la mer–. Bista ederra daude puntu honetan ere eta oinezkoendako beste bide batetik jarraitzeko aukera izango dugu tarte batez.

Itsasoaren Bulevarrak Mac Corskey Generalaren hiribidearekin bat egiten duenean hasiko da beste mota bateko tartea. Etxe artean izango da. Espaloiak badaude, baina une batez ez dugu itsasoa begi bistan izango eta zirkulazioa handitu egingo da.

Enperatrizaren hiribidera iristerakoan ikusiko dugu berriz ere itsasoa. Pasealeku batek eramango gaitu itsasargiraino eta itsas ertzetik izango da.

Biarritzeko itsasargia San Martin lurmuturrean dago kokatuta. Begiratoki ederra da. Itsasargia bisitatzeko aukera badago nahiz eta bolada batez itxita dagoen lanak direla eta. Kontsultatu bisita egiteko aukera hemen.

Itzultzeko bidea leku beretik egin behar da. Itsasargitik abiatu eta berehala har dezakegu ezkerretara Haitzart kalea. Itsasoa begi bistan dugula egingo dugu zati bat eta Mac Corskey Generalaren hiribidera irtengo gara berriz.

Itsasoaren Bulevarrean egingo dugu beste zati bat, eta Iturburuen Pasealekuaren –Promenade des Sources– egin beharrean jaitsiera hartuko dugu Paul Prieto kalea. Beste pasealeku polit bat da. Erraz iritsiko gara aparkalekura.

Bidean zehar hainbat begiratoki, eserlekuak dituzten jardinak eta atsedenlekuak aurkituko ditugu.

Argazkiak: Pablo Sanxiao, Nacho 540, Maïlis Donnet eta Google.