Jolasa ulertzeko eta bizitzeko modu berriak ezagutzeko tresna baliagarria da Jolasparkeak.eus. Euskal Herri osoko aire libreko jolaserako espazio bereziak bildu eta herritarren eskura jartzen dituen ataria da gurea; familiei, hezitzaileei eta aisialdia naturan gozatu nahi duten guztiei zuzendua.

Animatu zaitezte uda honetan Euskal Herriko jolasparkeak ezagutzera. Gidan daudenetatik aparte beste jolasgunerik ezagutzen baduzu, proposatu eta gidan gehituko dugu!

Ohiko haur-parkeen zerrenda hutsa baino gehiago da. Plataformak zazpi herrialdeetako ehunka gune biltzen ditu, lau kategoriatan sailkatuta: jolas parkeak, jolasguneak, urguneak eta heziguneak. Horrela, txirrista eta kulunkak dituzten parkeez gain, naturguneak, erreka bazterrak, hondartzak, basoak, plazak eta hezkuntza-komunitateek sortutako kanpo espazio inspiratzaileak ere aurki daitezke.

Webguneak mapa interaktibo baten bidez erraz bilatzeko aukera eskaintzen du, eta bisitari bakoitzak bere inguruko edo bisitatu nahi duen eskualdeko proposamenak aurki ditzake. Helburua ez da soilik lekuak erakustea, baizik eta jolasa, natura eta espazio publikoaren erabilera sustatzea, haurrek askatasunez esploratzeko eta familiek kalitatezko denbora partekatzeko aukerak zabalduz.

Gainera, Jolasparkeak.eus herritarren ekarpenetara zabalik dago. Erabiltzaileek gustuko dituzten jolasguneak proposatu ditzakete, gida etengabe aberastu eta Euskal Herriko txoko berezi gehiago ezagutarazteko.