Seme-alaben heziketan zailtasunak dituzten familiei zuzendutako programa abiatuko du Agipad elkarteak Gipuzkoako hainbat herritan; tartean, Bergaran (hilaren 11ra arte eman ahalko da izena 943 77 91 26 telefonoan edo aloidi@bergara.eus helbidera idatzita).

Antolatzaileen arabera, saioen helburua gurasoek estrategia pertsonalak, emozionalak eta hezkuntzakoak bereganatzea da, familiako “bizikidetasuna errazteko” eta “gurasotasun-eredu positiboak garatzeko”. Pakita Mateos prebentzio taldeko arduradunak azaldu ditu programaren nondik norakoak.

Heziketan zailtasunak dituzten familiei zuzendutako programa dela diozue. Nolako zailtasunez ari gara?

Seme-alaben heziketan edozein familiak izan ditzakeen zailtasunak izan daitezke. Bai familia-sistemak berak dituen ezaugarriengatik sortutakoak (bi guraso daudenean eta horietako batek eragiten ez duenean; guraso bakarreko familiak; dibortzio prozesu korapilatsua izan dutenak…) edo baita gurasoek erabiltzen dituzten heziketa-ereduengatik sortzen direnak ere. Horiez gain, seme-alabek izan ditzaketen arazoek eragindakoak ere izan daitezke zailtasun horiek (eskolako egokitzapenean, errendimenduan, edo portaeran dauden arazoak; drogen kontsumo goiztiarrak eragindakoak…). Askotariko egoerak sortu daitezke egunerokotasunean, eta askotan, guraso bezala, ez dugu jakiten nola jardun.

Hortaz, edozein familiatan bizi daitezken egoerak izango dituzue hizpide saioetan…

Hori da, programa ez da “arazo larriak” dituzten familia edo gurasoentzat. Asmoa bi espazio sortzea da: talde bat 3 eta 10 urte bitarteko seme-alabak dituztenena eta bestea 11 eta 16 urte bitartekoen gurasoena.  Gehienez 10 lagun batuko gara, eta bakoitzaren esperientziak eta ezin-egonak partekatzea da xedea.

Zein da zuek egingo duzuen ekarpena?

Ariketa gurasotasun positibotik begiratuta proposatzen dugu. Gure ustez, garrantzi handia duen prebentzio lana da. Batez ere oso garrantzitsua izango da jokabideak despatologizatzea eta normalizatzea, eta familiei indarra ematen saiatzea. Ditugun arazoak eta zailtasunak partekatu ostean, ziur gauzak hobeto joango direla. Halere, egia da arazo batzuk inoren laguntza gabe konpondu daitezkeela, baina beste batzuk, agian, profesionalen laguntzaz egin beharko direla.

Ohikoa da gurasoek ezjakintasun egoerak bizitzea? Baliabiderik badago horri aurre egiteko?

Azken hamarkadetan gure gizarteak aldaketa handiak –eta azkarrak– izan ditu familiaren egiturari eta dinamikari dagokienez Ohikoa izan da gurasotasuna eta heziketa-eredua gure aurreko belaunaldietan oinarritzea –gure seme-alabak gu hezi gaituzten bezala heztea, alegia–, baina orain horrek ez du balio; ez du zentzurik, ez da bideragarria. Egun bizi dugun errealitateak ez du zer ikusirik duela 20, 30 eta 40 urtekoarekin, eta eredu eta erreferente falta dugu gurasotasunaren alorrean.

Gainera, erronka berriak ditugu, esaterako gainera etorri zaigun pandemia hau. Hori ere familia-bizitzan eragin zuzena izaten ari da, eta ez du errazten seme-alaben heziketarako bidea.

Horren aurrean, zer?

Ez gara ahalguztidunak, ez dugu beti dena ondo egiten jakin behar, eta ez dago zailtasunik gabe bizi den familiarik. Baina egia da  gure kezkak norbaitekin partekatzeak asko laguntzen duela; interesgarria da.

Zehazki zein eduki landuko dituzue saioetan?

Alde batetik, familiaren egitura landuko dugu (gurasoen hierarkia, azpisistemen arteko aliantza egokiak…); bestetik, komunikazioa (entzute aktiboa, desberdintasuna onartzeko gaitasuna…); horrez gain, lehen esan dudan moduan, gurasotasun positiboa; eta bukatzeko, bizikidetasuna, lotura afektiboak, familiaren ahalduntzea…

Etiketak: