Indarkeria Matxistaren Kontrako Nazioarteko Eguna da gaur. Hainbat elkarretaratze, manifestazio eta mobilizazio egin dira Euskal Herriko herri eta kaleetan.

Emakundek, aurten, pornoaren kontsumoaren inguruan ohartarazi du Azaroaren 25aren bueltan egin duen komunikazio kanpainan. “Pornoa emakumeen aurkako indarkeriaren eskola bat da” adierazi du.

Pornoaren kudeaketa familian izenburupean egin zuen tailerra EMAIZE Sexologia Zentroko Miren Lopez de Arregik, Aramaion. Eta, nola ez, familien heziketa sexualaren erronkaz aritu zen. Porno eskaintza 24 orduz eta asteko zazpi egunetan ematen dela gogorarazi zuen; mugagabea eta doakoa dela ere azpimarratu zuen. Gazteek Internet bidez dute pornorako sarbidea. “Esperientziak esaten digu askotan bilatu gabe heltzen zaiela eduki pornografikoetarako sarrera. Gehien-gehienetan lehen kontsumoak ez dira bilatuak”.

Adituak azaltzen du pornografiak milioiak eta milioiak mugitzen dituen negozio bat dela. Eredu pornografiko nagusia aztertu behar dela uste du eta gehitzen du begi bistakoa dela eredu maskulinotik oso gertu dagoela. “Beldurrik gabeko begirada polit batetik gerturatu beharko genuke sexualitatera”, azaldu du.

Save The Children erakundearen ikerketa

Lopez de Arregiren esanetan 12 urte dira pornoa kontsumitzen hasteko batez besteko adina. Mutilen kasuan %81,6 dira pornoa egunero edo maiz kontsumitzen dutela onartzen dutenak. Nesken kasuan %40,4.

Pornografia ikaskuntza-iturri ikusten du %48ak eta informazio-iturri bakarra da %30arentako.

Emaizeko adituak azaltzen du askotariko ikerketak egin direla pornoaren kontsumoaren inguruan, eta bere iritziz garrantzitsua da ikerketa zein erakundek egin duen eta zer nolako lagina erabili duen begiratzea. Save The Children erakundeak 2020an egindako ikerketa gomendatzen du bereziki.

Ikerketa horren arabera nerabeek 12 urterekin ikusten dute pornografia lehen aldiz, eta 10etik ia zazpik (% 66,5) nahiko maiz gainera. 10 mutiletatik 9k ikusi dute inoiz pornografia, eta nesken kasuan, berriz, erdiek. Bi kasuetan, lehen kontaktua parekoen taldearen bidez izan dute: lagunen batek gailuren batean erakutsi diete, edo horretaz hitz egin die, eta, gero, beraiek bilatu dute. Kontsumo hori intimitatean egiten dute normalean (% 90,2), sakelako telefonoan, eta sareko edukiak dira, doakoak (% 98,5), kasu gehienetan indarkerian eta harreman desorekatuetan oinarritutakoak.

Zenbait gauza, ordea, aldatzen doaz. Lehen intimitatean ikusten zen pornografia eta gaur egun askotan publikoki ikusten dute gazteek. Hau da, taldean ikusten dute mugikorretan gehienetan.

Gurasoentzako gida

Gaia aztertzeaz gain, hainbat gomendio ematen zaizkie txostenean familiei, hezkuntzako eta osasuneko profesionalei eta nerabeei eurei, sexualitateaz eta gaia jorratzeko moduaz. Aldi berean, erakundeak gurasoei zuzendutako gida espezifikoa garatu zuen.