0-5 urte bitarteko haurrentzat pentsatutako jolas eta abesti bilduma da Gipuzkoako urtxintxa elkarteak kaleratu duena. Jolas mota ezberdinak aurkituko dituzue bertan:  sehaskakoak, laztanak egitekoak, sendatzekoak, jatekoak, txalo egitekoak, esku jolasak, magalerakoak, biribilean egitekoak, igarkizun jolasak, sokasaltoa, goma…
Telebistan, ordenagailuan, autoan edo musika-irakurgailutan entzun eta ikusteko aukera izango duzue. 

Bilduma honen nondik norakoez eta covid 19 aren ondorioz Urtxintxan bizi izandakoez hitz egin dugu elkarteko kide den Maite Asensiorekin.


Jolasa da guraso, irakasle eta hezitzaileek haurrei eskain diezaieketen oparirik onena. Jolasa da haurraren hizkuntza naturala; abesti eta jolasen bitartez, maitasuna, errespetua, kultura, hizkuntza, ametsak… transmititzen dizkiegu gure haurrei. 

Hona hemen, beraz, haurra jaiotzen den unetik, bere lehen urteetan erabiltzeko euskal jolasen bilduma bat. Hartu, ikasi, ikusi eta entzun, baina batez ere, JOLASTU!