Kalean oinez zoazela jateko zerbaiten gogoa sentitu eta jatetxe interesgarria topatu duzu begi aurrean, Bilboko erdialdean zaude eta ospe ederra hartu duen espazioa da. Gerturatu eta zera ikusi duzu atean:   “Sarrera debekatua beltzei.”


Nola? Inondik inora ez naiz sartuko arrazismo argia duen toki batean. Argia diot, gutxienez idatziz jartzeko ausardia lukelako… ze jakin badakigu badirela arrazagatik sarrera mugatzen duten espazio asko gure kaleetan. 
Eskerrak! Gaizki irakurri duzu… A ze lasaitua.


Begia zorroztu eta bigarren irakurketan zera ikusi duzu:
“Sarrera debekatua homosexualei”.
Barkatu? Ez ez. Espazio homofobiko batean ez dut kontsumituko. Eta gainera protesta egingo dut ahal dudan tokietan.


Ene… berriro gaizki ikusi duzu. Ez dio hori… Ea… 
“Sarrera debekatua emakumeei”.
Falta zitzaiguna! Emakume izateagatik ezin dut hor sartu? Ikusiko dute inguruko talde feministei deitzen diedanean.


Itxaron! 
Ez, ez dio hori…
“Sarrera debekatua adim txikikoei”. 
Eskerrak, banoa hortaz barrura, lasai bazkaldu ahal izango dut azkenean…


Justua iruditzen zaizu? 
Bada, arazo larri bat duzu. Ongi zehaztua dago adingabeen babeserako (eta ez helduen “lasaitasunerako”) zein espazio diren sarrera debekatu dezaketen bakarrak. Eta ez, jatetxeak ez daude kategoria horietan. Haurrak, ez bazenekien ere, pertsonak dira eta arraza, generoa edo orientazio sexuala dela eta diskriminatzea bezain larria da adinagatik diskriminatzea. 
Kalean zoazela Bilboko jatetxe horrekin topo egiten baduzu, mesedez, pentsa ezazu zure ezaugarriren batengatik sartzen utziko ez balizute nola sentituko zinateken.